Veiði

Fyrstu lokatölur úr laxveiðinni

Karl Lúðvíksson skrifar

Fyrstu lokatölur úr laxveiðiánum eru komnar í hús og í nokkrum tilfellum sýna þær svart á hvítu hversu erfitt þetta sumar var í sumum ánum.

Vesturlandið átti sérstaklega undir högg að sækja þar sem þurrkar gerðu árnar svo vatnslitlar að líklega hefur aldrei verið jafn lítið vatn í ánum. Þegar loksins fór að rigna áttu nokkrar ár mjög góða spretti og má þar til að mynda nefna Laxá í Dölum og Langá á Mýrum en í Langá til að mynda veiddust jafn margir laxar fyrstu tvær vikurnar í september eins og fyrstu tvo mánuðina í sumar þegar veiði hófst. Það vantar tölu úr Laxá í Dölum inná listann en fréttir þaðan síðustu viku eru almennt góðar þó svo að áin sé líklega komin á flot eftir rigningu síðustu fjóra daga.

Lokatölur eru komnar úr Norðurá sem er með 577 laxa sem er lélegasta veiði í ánni frá 1974 og það er nokkuð ljóst að það þarf að grípa til aðgerða í ánni því það var afskaplega lítið af laxi í henni. Lokatalan úr Elliðaánum er 537 laxar en frá árinu 2000 hafa fjögur ár verið lakari. Skjálfandafljót endaði í 330 löxum sem er 80 löxum betri veiði en í fyrra en hún hefði getað farið hærra hefði hún verið betur seld því það var eftir því sem við höfum heyrt gott magn af laxi í henni eins og flestum ám í þessum landshluta. 

Búðardalsá lokar með 98 löxum eða 233 undir veiðinni í fyrra og svo eru það Straumarnir með 56 laxa lokatölu sem er líklega án efa eitt lélegasta sumar þar fyrr og síðar og endurspeglar slaka veiði í Norðurá. Það er ennþá veitt í rétt tæpa átta daga en lengur í hafbeitaránum svo lokatölur þaðan eru ekki væntanlegar fyrr en í lok október. Listann í heild sinni má finna á www.angling.is



 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.