Veiðin á vesturlandi hefur í mörgum ánum tekið heldur betur kipp og í mörgum tilfellum að bæta upp ansi magurt sumar.

Kvennadeild SVFR var að ljúka veiðum í ánni í gær en ferðin er árleg hjá þessum vaska hóp kvenna og það er óhætt að segja að þær hafi veitt vel. Áin tók á móti konunum í góðum gír og strax á fyrstu vakt var ellefu löxum landað. Veiðin var erfið sökum kulda og roks næstu tvær vaktir en engu að síður tókst að setja í sex maríulaxa á þeim vöktum og að auki komu tveir maríulaxar upp á fyrstu vakt. Samtals voru það átta maríulaxar sem veiddust í hollinu.

Hollið lauk veiðum með 36 löxum sem komu á land og það slapp líklega annað eins af færinu. Tveir stangir lentu í ótrúlegri töku í Efri Hvítstaðahyl en þær voru þar í fylgd með undirrituðum í leiðsögn um ánna. Þar settu þær í og spiluðu níu löxum og af þeim fimm landað á aðeins rétt rúmum klukkutíma. Laxarnir sem veiddust tóku svo til allir litlar flugur í stærðum 16-18# og voru flugur eins og Nagli og Green Brahan gjöfular. Vel gert hjá þessum glæsilega kvennahóp!