Bílar

Fyrsti tengiltvinnbíll Ferrari er 986 hestöfl

Ferrari SF90 Stradale er með ógnarafl og leit er að bíl sem er sneggri á sprettinum.
Ferrari SF90 Stradale er með ógnarafl og leit er að bíl sem er sneggri á sprettinum.

Ítalski sportbílaframleiðandinn Ferrari verður ekki vændur um að stökkva snemma á rafbílalestina, en nú er þó kominn fram fyrsti Ferrari-bíllinn með innstungu, það er SF90 Stradale. Það þýðir þó ekki að hann sé hreinræktaður rafmagnsbíll, heldur með bæði brunavél og rafmótora. Í leiðinni fer hér öflugasti fjöldaframleiddi bíll Ferrari frá upphafi, enda hestöflin hvorki fleiri né færri en 986. Þau koma frá 769 hestafla V8 bensínvél og þremur samtals 217 hestafla rafmagnsmótorum. Einn þeirra er staðsettur milli vélar og sjálfskiptingar bílsins og sitt hvor mótorinn er svo á framhjólunum. Það gerir bílinn fjórhjóladrifinn.

Er 2,5 sekúndur í 100
Ferrari SF90 Stradale er með fjórum akstursstillingum, eDrive fyrir eingöngu akstur á rafmagni, Hybrid fyrir blöndu beggja, Performance en þá er brunavélin alltaf í gangi og Qualify þar sem hámarksafl rafmagnsmótoranna er nýtt.

Ferrari segir að þeim auka 270 kílóum sem bíllinn þyngist um með rafhlöðunum og rafmótorunum sé meira en mætt með því aukaafli sem fæst úr rafmagninu. Bíllinn er aðeins 2,5 sekúndur í 100 km hraða og hámarkshraðinn er 340 km/klst. Ferrari SF90 Stradale er sem dæmi 0,4 sekúndum sneggri í hundraðið en hinn 710 hestafla Ferrari F8 Tributo og er þremur sekúndum sneggri að fara Fiorano tilraunabraut Ferrari en F8 Tributo. Rafhlaða SF90 Stradale er ekki ýkja stór, 7,9 kW, og því dugar hámarksafl rafmótoranna ekki lengi, en þó fyrir heilan hring á flestum keppnisbrautum.

Hægt er að aka bílnum um 25 kílómetra á rafmagninu einu saman og með því má aka bílnum á allt að 135 km hraða. Söluverð Ferrari SF90 Stradale er 430.000 evrur í Evrópu, eða 60 milljónir króna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.