Viðskipti innlent

Útlensk Ísey ódýrari en íslensk Ísey

Stefán Ó. Jónsson skrifar
Vörumerkið Ísey hefur verið í mikilli útrás á síðustu árum, það má til að mynda fá í Japan.
Vörumerkið Ísey hefur verið í mikilli útrás á síðustu árum, það má til að mynda fá í Japan. Mjólkursamsalan
Ísey skyr er ódýrara í Finnlandi og Bretlandi en á Íslandi. Skyrið er framleitt á Jótlandi í Danmörku og síðan selt áfram til annarra landa. Það sé þó engu að síður selt á svipuðu verðbili á Íslandi og annars staðar í Evrópu að sögn Mjólkursamsölunnar.

Íslendingar í útlöndum reka reglulega augun í Ísey skyr í hillum stórverslana. Vörumerkið hefur í mikilli útrás á síðustu árum og er það nú fáanlegt um allan heim; jafnt í Bandaríkjunum, Evrópu og í Japan.

Sjá einnig: Skyr MS í 5.500 bandarískum verslunum



Það er þó ekki síst verðið á skyrinu sem hefur vakið athygli Íslendinga. Þannig benti lögfræðingurinn María Rún Bjarnadóttir á það í vor að 170 grömm af Ísey skyri kosti þar 99 pens sem samsvarar um 150 krónum.

Skáldkonan Þórdís Gísladóttir vakti síðan athygli á því í dag að svipaða sögu sé að segja frá Finnlandi.

Þar megi kaupa 170 grömm af Ísey skyri á 99 evru sent, sem jafngildir um 137 íslenskum krónum.

Sambærilegt Ísey skyr er hins vegar dýrara á Íslandi.

Þannig kostar 170 gramma skyrdós 175 krónur í Bónus, í Krónunni er hún á 178 krónur og sama dós 189 krónur í Nettó, eins og sjá má hér að neðan.

170 gramma skyrdósir í kæli í Nettó á Akureyri.Vísir/tpt

Ísey ótengt Íslandi

Sunna Gunnars Marteinsdóttir, samskiptastjóri Mjólkursamsölunnar, segir mikilvægt að huga að því að MS selji í heildsölu og að „frjáls verðlagning er á matvörumarkaðinum hér og annars staðar.“

Skyrið sem selt er í Bretlandi og Finnlandi sé þannig framleitt í Danmörku og því ekki „tengt íslensku landbúnaðarkerfi“ eins og látið sé í veðri vaka í færslunum hér að ofan.

Aukinheldur sé verðbilið sem Ísey skyr er selt á er „svipað hérna á Íslandi og erlendis.“

Sunna nefnir í því samhengi að verðbil á Ísey skyr í Finnlandi sé alla jafna frá 136 krónum til 275 króna, eftir því hvaða tegund er keypt og í hvaða búð er verslað. Það sé ekki mjög ósvipað á Íslandi, þar sem verðbilið er frá 125 krónum upp í 309 krónur.

Mjólkursamsalan kynnti Ísey til leiks sumarið 2017.
„Að þessu sögðu er svo ágætt að minna á að íslenskur mjólkuriðnaður er lítill en með meiri stærð kemur meiri hagkvæmni. Til samanburðar á fyrirtækjum milli landa veltir MS 28 milljörðum árlega meðan aðrir mjólkurframleiðendur eru víða að velta 500-2000 milljörðum,“ segir Sunna.

Þá hafa Samtök atvinnulífsins bent á að fleira þurfi að taka með í reikninginn þegar borið er saman vöruverð á milli landa. Þannig skipti kaupgeta miklu máli, hversu lengi Íslendingar eru að vinna fyrir matarkörfunni, samanborið við aðrar þjóðir.

„Samkvæmt upplýsingum OECD var meðaltímakaup eftir tekjuskatt 55% hærra á Íslandi en í Finnlandi og verðlag á mat og drykkjarvöru 30% hærra skv. upplýsingum hagstofu ESB. Kaupmáttur launa gagnvart mat- og drykkjarvörum var þannig 20% hærri á Íslandi en í Finnlandi,“ segir í úttekt SA frá því í upphafi árs.

Í ljósi hærra tímakaups á Íslandi en í Finnlandi tók það meðal Íslending 8 klukkustundir að vinna fyrir mánaðarlegum útgjöldum til mat- og drykkjarvara en það tók Finnann 9,5 klukkustundir að vinna fyrir sömu vörukörfu.


Tengdar fréttir

Mikill munur á verði matvöru netverslana

Verulegur verðmunur getur verið á milli netverslana með matvöru samkvæmt verðathugun Fréttablaðsins. Þrjú fyrirtæki sérhæfa sig helst í matvöru á netinu. Framkvæmdastjóri Bónuss segist ekki geta farið í netverslun sem sakir standa.

Skyr MS í 5.500 bandarískum verslunum

Forstjóri Mjólkursamsölunnar segir að sala fyrirtækisins sé undir væntingum og að áhrif Costco séu talsverð. Fyrirtækið ætlar inn á nýja markaði og alla leið til Asíu.






Fleiri fréttir

Sjá meira


×