Hagnaður Samherja nam 8,7 milljörðum króna

Hagnaðurinn af rekstri Samherja hf. nam 8,7 milljörðum króna á síðasta ári. Þetta kom fram á aðalfundi félagsins en sagt er frá á heimasíðu fyrirtækisins. Tekjur Samherja námu 43 milljörðum króna.

Þorsteinn Már Baldvinsson forstjóri segir árið hafa verið að sumu leyti sérstakt fyrir Samherja.

„Þetta er fyrsta heila árið sem Samherji gerir ekki út neinn bolfiskfrystitogara frá Íslandi. Félagið hóf rekstur með einum frystitogara og þeir hafa í gegnum tíðina gegnt veigamiklu hlutverki í rekstri okkar þannig að þetta er mikil breyting á fyrirtækinu. Sjófrystingu á uppsjávarfiski lauk einnig á árinu með sölu á Vilhelm Þorsteinssyni EA sem hefur verið eitt fengsælasta skip Íslandssögunnar", segir Þorsteinn Már.

Hann minnir á að Samherji sé í hópi stærstu skattgreiðenda landsins. Fyrirtækið og starfsmenn þess hafi greitt um 4,7 milljarða króna til hins opinbera í fyrra.