Opinn fundur hófst í Valhöll í morgun þar sem Bjarni Benediktsson formaður Sjálfstæðisflokksins ræðir stjórnmálaviðhorfið og aðrir þingmenn sitja fyrir svörum. Þó að það komi ekki sérstaklega fram að fundurinn fjalli um orkupakka þrjú er næsta öruggt að það mál sé til umræðu á fundinum. Fullt er út úr dyrum í Valhöll og ekki sæti fyrir alla fundargesti.

Það var fjölmennt þegar fundurinn hófst í Valhöll í morgun og mátti sjá talsverða eftirvæntingu hjá flokksmönnum. Rætt var við Jón Kára Jónsson sem er einn af forystumönnum hverfafélaga sjálfstæðismanna í Reykjavík en hann hefur efnt til undirskriftasöfnunar um atkvæðisgreiðslu meðal flokksbundinna sjálfstæðismanna þar sem fólk er hvatt til að kjósa um þriðja orkupakkann. Hann bjóst fastlega við því að orkupakki þrjú yrði til umræðu þegar heyrt var í honum í morgun. Atkvæðagreiðslan hófst á þriðjudag á síðunni xd5000.is og segir Jón að hún hefði farið vel af stað.

„Það er greinilegt að þetta mál brennur enn heitar á landsbyggðinni en hér í borginni. Það kann að vera vegna þess að sum af þessum svæðum eru kynnt [með] raforku. Þannig að óttinn við hækkandi orkuverð þegar allt er hér orðið frjálst með verðlagningu brennur þar eflaust heitar á landsbyggðinni. Mér finnst það líklegt og eðlilegt.“

Jón er sannfærður um að ef þriðji orkupakkinn verði innleiddur þýði það afsal á fullveldi yfir orkuauðlindum.

„Evrópusambandið smíðar regluverkið. Ef menn taka upp regluverkið verða þeir að hlíða þeim leikreglum sem þar eru,“ segir Jón.

Þannig að þegar menn segja að þetta þýði ekki afsal á yfirráðum yfir auðlindum þá eru þeir ekki búnir að kynna sér þetta mál nægilega vel að þínu mati?

„Já það er bara þannig, það mun ekki gerast á morgun eða hinn. Þetta mun gerast hægt og bítandi. Við munum smátt og smátt tapa yfirráðunum yfir þessari auðlind.“

Er það þróun sem þú getur bent á að hafi orðið í öðrum löndum?

„Viltu horfa á til dæmis Belgíu núna þar er Evrópusambandið komið í málaferli við Belgíu núna því þar hefur ekki verið staðið rétt að innleiðingu þriðja orkupakkans,“ segir Jón.

Síðustu vikur hefur verið erfitt að ná í flokksforystuna vegna málsins en Þórdís Kolbrún Reykfjörð Gylfadóttir varaformaður Sjálfstæðisflokksins tjáði sig um málið eftir ríkisstjórnarfund í vikunni.

„Við erum auðvitað með mál í höndunum sem við höfum rætt lengi og mikið um og gert breytingar á. Ég þekki að sjálfsögðu vel skoðanaskipti um málið innan míns flokks. Málið er inni í þinginu. Það er búið að afgreiða nefndarálit,“ sagði Þórdís Kolbrún. „Við erum að koma saman í lok ágúst til að klára það. Ég mun halda áfram að funda með mínu fólki um landið og við þingmenn. Það er verkefni þá næstu daga, þangað til við komum saman á þingi í lok ágúst.“

Bindurðu vonir við að þessir tveir dagar þar muni ljúka málinu?

„Já, um það snýst samkomulagið. Að ljúka málinu þá.“

Heldurðu að það muni lægja öldurnar í þínum flokki?

„Já, þetta er auðvitað ekki í fyrsta sinn sem við erum með í höndunum mál sem er umdeilt.“