Innlent

Fjármunir til að niðurgreiða innanlandsflug eru til

Jóhann K. Jóhannsson skrifar
Farþegar ganga um borð í Bombardier Q400 á Akureyrarflugvelli.
Farþegar ganga um borð í Bombardier Q400 á Akureyrarflugvelli. Stöð 2/Friðrik Þór Halldórsson.
Samgönguráðherra vonast til að skoska leiðin til að tryggja innanlandsflug með niðurgreiðslum flugfargjalda verði tekin upp á næsta ári. Fjármunirnir séu til en kerfið eins og það er í dag virki ekki fyrir flugfarþega, flugfélögin eða flugvellina.

Með fækkun i flugflota Air Iceland Connect í innanlandsflugi úr sex vélum í fjórar verður flugferðum til Egilsstaða og Ísafjarðar fækkað. Staðan er svipuð hjá flugfélaginu Erni þar sem ferðum til Vestmannaeyja, Hornafjarðar og Húsavíkur verður fækkað.

Bæjarstjóri Ísafjarðarbæjar sagðist í kvöldfréttum Stöðvar 2 í gær ekki skilja hvers vegna stjórnvöld hafi ekki staðið nú þegar við fögur fyrirheit um að taka upp svokallaða skosku leið þar sem flugfargjöld íbúa á landsbyggðinni eru niðurgreidd um allt að helming.

Sigurður Ingi Jóhannsson samgöngu- og sveitarstjórnarráðherra segir það áhyggjuefni að innanlandsflug sé að dragast saman. Farþegum fækkað og reksturinn erfiður.

„Þess vegna höfum við nú verið með þá vinnu í gangi að velta fyrir okkur hvernig við getum breytt núverandi stuðningi í kerfi sem virkar betur. Og þess vegna tók þingið í samgönguáætlun, í byrjun febrúar á síðasta ári, ákvörðun um að fela framkvæmdavaldinu, mér þá í þessu tilviki, að útfæra þessa svokölluðu skosku leið og það er það sem við erum að vinna eftir. Og þó að það taki tíma á vonast ég að hún muni komast í gagnið á næsta ári,“ segir Sigurður.

Ein skýringin á samdrætti í innanlandsflugi er sú að erlendir ferðamenn hafa ekki nýtt sér þjónustuna eins og gert var ráð fyrir.

„Kannski er of mikill munur eða of lítill munur á verði flugmiðans og bílaleigubílsins. Kannski eru ferðamenn í vaxandi mæli að vilja ferðast einir. Það kom auðvitað líka fram að þróttur víða úti á landi vegna loðnubrests hafi áhrif og ég held að það sé ákveðin skýring sem að skýrir margt,“ segir Sigurður.

Sigurður Ingi Jóhannsson, samgöngu- og sveitarstjórnarráðherra.Vísir/Vilhelm

Fjármunir til að tryggja innanlandsflug til en ekki rétt nýttir

„Miðað við þá vinnu sem hefur verið unnin að þá hefur verið bent á að einhverjar 700-800 milljónir myndu geta snúið við, talsvert, þessari þróun, og veita fólki þennan möguleika á að fá niðurgreiddan flugmiða upp að tilteknum fjölda flugferða og þá fjármuni höfum við í dag, við bara beitum þeim öðruvísi og þeir virka ekki. Hvorki fyrir farþegana né fyrir flugfélögin eða flugvellina. Þess vegna held ég að það sé nauðsynlegt að skipta um kerfi,“ segir Sigurður Ingi Jóhannsson, samgöngu- og sveitarstjórnarráðherra.


Tengdar fréttir

Almenningssamgöngur fyrir allt landið

Skilvirkar samgöngur eru undirstaða verðmætasköpunar. Almenningssamgöngur eru stór liður í þeirri breytu ásamt því að ná settum markmiðum í umhverfismálum.




Fleiri fréttir

Sjá meira


×