Erlent

Færa hundruð vanræktra innflytjendabarna úr landamærastöð

Kjartan Kjartansson skrifar
Landamærastöðin í Clint þar sem hundruð barna hefur verið haldið við lélegan aðbúnað undanfarnar vikur.
Landamærastöðin í Clint þar sem hundruð barna hefur verið haldið við lélegan aðbúnað undanfarnar vikur. AP/Cedar Attanasio

Bandarísk yfirvöld hafa fært á þriðja hundrað innflytjendabörn sem þau höfðu haldið í landamærastöð í Texas í önnur úrræði. Fréttir höfðu borist af því að sum börnin hafi verið látin dúsa í stöðinni í fleiri vikur og við illan aðbúnað. Aðstæður í innflytjendaskýlum sætir harðri gagnrýni réttindasamtaka og stjórnarandstæðinga.

Varað er við mynd sem birtist neðar í fréttinni sem gæti valdið óhug.

Tugir þúsunda innflytjenda hafa streymt yfir landamæri Mexíkó og Bandaríkjanna undanfarnar vikur og mánuði. Í mörgum tilfellum er um að ræða börn sem koma án foreldra eða forráðamanna.

Eftir að lögfræðingar fengu að heimsækja landamærastöð í bænum Clint í Texas í síðustu viku bárust fréttir af því að börnin þar hefðu sum dvalið þar í margar vikur þrátt að þeim eigi samkvæmt reglum að koma í hendur heilbrigðisyfirvalda innan þriggja sólahringa. Skýli þeirra eru yfirfull.

Þau hefðu ekki aðgang að sápu, hreinum fötum eða viðunandi mat og vatni. Börn allt niður í átta ára gömul  voru sögð þurfa að gæta ungbarna og ungra bleyjulausra barna þar sem þeim var haldið mörgum saman. Önnur voru veik og hefði inflúensa greinst í einhverjum þeirra.

Börnin í landamærastöðinni í Clint nærri El Paso höfðu annað hvort verið tekin af ættingjum sínum þegar þau komu yfir landamærin eða eru börn táningsmæðra sem var einnig haldið þar.

„Skammtímaskýli okkar eru ekki hönnuð til að halda viðkvæmum hópum og við þurfi nauðsynlega á mannúðarstuðningi að halda til að ná tökum á þessu neyðarástandi,“ segir landamæraeftirlitið við AP-fréttastofuna.

Frá innflytjendaskýli landamæraeftirlitsins í McAllen í Texas í fyrra. Þar er fólki sem hefur komið ólöglega yfir landamærin frá Mexíkó haldið fyrst um sinn. Vísir/AP

Fimm börn dáið síðasta misserið

Fregnir af slæmum aðbúnaði barna hafa borist frá fleiri skýlum þar sem bandaríska tolla- og landamæraeftirlitið heldur þeim sem hafa komið yfir landamærin frá Mexíkó. AP-fréttastofan segir að fimm börn hafi dáið í haldi yfirvalda frá því seint í fyrra.

John Sanders, starfandi forstjóri tolla- og landamæraeftirlitsins, sagði í síðustu viku að stofnunin væri nú með um 15.000 manns í haldi. Hámarksfjöldinn sem hún taldi sig geta tekið við væri 4.000.

New York Times segir að 249 börn hafi verið færð úr landamærastöðinni í Clint í neyðarskýlakerfi sem stofnun sem sér um að koma flóttamönnum fyrir rekur. Ótilgreindur fjöldi til viðbótar hafi verið sendur í bráðabirgðatjaldbúðir í El Paso. Um þrjátíu börn eru sögð eftir í landamærastöðinni.
 

„Hver vill annast þennan litla strák?“

Frásagnir barna sem voru hýst í landamærastöðinni sem lögfræðingarnir fengu að ræða við þóttu sláandi. Sumir demókratar líktu þeim við fangabúðir.

„Landamæravörður kom inn í herbergið okkar með tveggja ára gamlan strák og spurði okkur: „Hver vill annast þennan litla strák?“ Önnur stelpa sagðist ætla að sjá um hann en hún missti áhugann eftir nokkrar klukkustundir svo ég fór að annast hann í gær,“ sagði ein stúlka við lögfræðingana, að sögn AP-fréttastofunnar.

Drengurinn er sagður hafa var hlandblautur með enga bleyju og bolurinn hans hafi verið útataður í hori þegar lögfræðingarnir fengu að hitta hann.

„Á mínum tuttugu og tveimur árum af því að heimsækja börn í haldi hef ég aldrei heyrt um svo mikla ómannúð,“ segir Holly Cooper, aðstoðarforstöðumaður útlendingalagastofnunar Kaliforníuháskóla.

Leiðin úr örbirgð í Mið-Ameríku til fyrirheitna landsins í norðri er þyrnum stráð. Yfirvöld í Mexíkó fundu lík manns og tæplega tveggja ára gamallar dóttur hans í ánni Río Grande í gær. Talið er að þau hafi verið frá El Salvador og drukknað við að reyna að komast yfir ána. Vísir/EPA

Látast úr hita og vökvaskorti

Á sama tíma berast fregnir af því að fólk láti lífið við það að reyna að komast yfir landamærin til Bandaríkjanna. Sjö innflytjendur fundust látnir nærri ánni Río Grande í suðurhluta Texas í gær. Þar á meðal var kona, tvö ungbörn og annað ungt barn.

Reuters-fréttastofan segir að talið sé að fólkið hafi látist af völdum hita og vökvaskorts. Mögulegt sé að það hafi verið látið í nokkra daga áður en landamæraverðir fundu líkin. Annað lík sem var farið að láta á sjá fannst nærri ánni í síðustu viku.

„Öfgahitinn á þessum árstíma getur verið banvænn,“ segir Raul Ortiz, svæðisstjóri landamæraeftirlitsins í Del Río.

Eftir að ríkisstjórn Donalds Trump Bandaríkjaforseta setti takmörk á hversu margir gætu sótt um hæli á landamærunum á hverjum degi eru margir innflytjendur sagðir leggja í hættulegan leiðangur til að komast yfir landamærin. Margir þeirra hafa látið lífi á lélegum flekum á Río Grande, þar á meðal þrjú börn og karlmaður frá Hondúras í apríl, eða orðið óbyggðunum að bráð.

Í fyrra létust 283 innflytjendur á landamærunum samkvæmt tölum bandaríska landamæraeftirlitsins. Mannréttindasamtök telja tölu látinna enn hærri þar sem líkamsleifar margra þeirra sem farast finnst aldrei og tölur landamæraeftirlitsins taki ekki með í reikninginn öll dauðsföll sem sveitarstjórnir á svæðinu halda utan um.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.