2000 urriðar á land hjá Ion

Veiðin á Ion svæðinu á Þingvöllum hefur verið mjög góð frá opnun og eru vinsældir svæðisins ekkert að minnka.

Það skal svo sem engan undra að það sæki margir í að veiða þarna enda eru urriðarnir stórir og feykna sterkir og skemmtilegir viðureignar. Heildarveiðin á svæðinu er komin yfir 2.000 urriða og ólíkt því sem oft er haldið fram dettur botninn alls ekki úr veiðinni yfir hásumarið. Vissulega minnkar veiðin aðeins en þessir tröllvöxnu ísaldarurriðar eru engu að síður á sveimi við Þorsteinsvík og við Ölfusvatnsárós þar sem mesta veiðin er oft á sumrin.

Veiðiaðferðum er aðeins breytt á þessum tíma og í stað þess að vera með straumflugur er veitt á litlar púpur og þurrflugu. Þetta er nefnilega mjög spennandi tími og svo ég tali ekki um á björtum kvöldum þegar þú sérð í bökin á 15-20 punda urriðum í kastfæri við þig. Það fær hjartað alveg til að slá aðeins hraðar. Það hefur verið uppselt á svæðið frá opnun en samkvæmt okkar heimildum eru einhverjar stangir lausar í júlí og ágúst.