Sveinbjörn ráðinn nýr forstjóri Isavia

Stjórn Isavia hefur ráðið Sveinbjörn Indriðason í starf forstjóra Isavia. Hann tekur við stöðunni af Birni Óla Haukssyni sem sagði starfi sínu lausu í apríl síðastliðinn.

Í tilkynningu frá Isavia segir að Sveinbjörn taki strax við starfinu, sem hann hafi gegnt undanfarna mánuði ásamt Elínu Árnadóttur aðstoðarforstjóra.

Alls sóttu 26 manns um stöðuna, en það var ráðningarstofan Intellecta sem annaðist ráðningarferlið.

Haft er eftir Orra Haukssyni, stjórnarformanni Isavia, að Sveinbjörn hafi á síðustu mánuðum sýnt mikla leiðtogahæfileika sem starfandi forstjóri Isavia. „Hann hefur mikla reynslu og þekkingu á fyrirtækinu – og hefur um leið slegið nýjan tón. Það eru fjölmargar áskoranir framundan og mikilvægt að stýrt sé af festu og ábyrgð. Við treystum Sveinbirni afar vel til þeirra verka. Um leið viljum við þakka þeim fjölmörgu hæfu umsækjendum sem sóttu um starfið og þann áhuga sem þeir sýndu.“