Farice að fullu í eigu ríkisins

Íslenska ríkið skrifaði í dag undir samning við Arion banka um kaup á um 38 prósent hlut bankans í félaginu Farice ehf. Eftir kaupin er félagið að fullu í eigu ríkisins þar sem ríkissjóður á um 65 prósent hlutafjár Farice en Landsvirkjun 33 prósent.

Í tilkynningu fjármálaráðuneytisins vegna kaupanna segir að íslenska ríkið hafi skilgreint fjarskiptasambönd til útlanda sem innviði. Eru kaupin gerð í ljósi þess.

„Arion banki varð hluthafi í Farice árið 2010 í kjölfar fjárhagslegrar endurskipulagningar en þar sem starfsemi Farice er ekki hluti af kjarnastarfsemi bankans, hefur hluturinn verið til sölu síðan þá,“ segir í tilkynningu.

Farice var stofnað árið 2002 af íslenska ríkinu og íslenskum og færeyskum fjarskiptafyrirtækjum. Tilgangur fyrirtækisins var að leggja sæstrenginn FARICE-1 sem tekinn var í notkun í janúar árið 2004.

„Fimm árum síðar lagði fyrirtækið jafnframt DANICE sæstrenginn til Danmerkur. Farice er langstærsti aðilinn í sölu á samböndum milli Íslands og útlanda. Viðskiptavinir fyrirtækisins eru fjarskiptafyrirtæki hvers konar og stærri viðskiptavinir gagnavera,“ segir í tilkynningu ráðuneytisins.