Guðmundur: Er hrærður

Guðmundur Guðmundsson landsliðsþjálfari Íslands var hrærður í leikslok eftir sigurinn gegn Makedóníu. Hann segir að hann hafi sjaldað séð jafn mikla baráttu og vilja eins og hann sá í kvöld.

„Mér fannst þetta stórkostleg frammistaða. Leikurinn var erfiður og eins og við vissum þá voru þeir að fara spila sjö á móti sex,“ sagði Guðmundur í samtali við Tómas Þór Þórðarson í leikslok.

„Við vorum búnir að fara yfir þetta endalaust. Þetta er ekki einfalt. Við ákváðum að keyra á þá í hvert skipti sem við gátum og planið var að keyra áfram á þá í síðari hálfleik.“

„Það gekk upp en leikurinn byrjaði kannski ekki vel fyrir okkur sóknarlega því við vorum að misnota færi sóknarlega. Það var ákveðið hik á okkur. Við misnotum víti og það var ákveðinn óheppni í gang, finnst mér.“

„Í staðinn fyrir að koma með endalaus nýjar ákvarðanir þá fórum við yfir stöðuna í hálfleik. Við ræddum ákveðna hluti og komum með einn nýjan hlut sem við byrjuðum á síðari hálfleik. Síðan löguðum við til taktíkarnar.“

„Við breyttum áhersluatriðum og það skóp það að við sköpuðum okkur frábær færi en varnarleikurinn var algjörlega stórkostlegur. Ég hef ekki oft upplifað svona baráttu og vilja. Ég er hrærður í dag.“

Arnar Freyr Arnarsson var algjörlega magnaður í vörn íslenska liðsins í dag og ekki síðri sóknarlega. Guðmundur hrósaði honum í leikslok.

„Þetta var algjörlega stórbrotinn leikur hjá honum og hann fórnar sér allan tímann. Ég spurði hann tvisvar hvort að hann þyrfti pásu en nei hann þurfti enga pásu. Hann vildi halda áfram og það er frábært. Það var líka mjög mikilvægt.“

„Síðan voru aðrir að standa sig rosalega vel. Þetta var mjög erfitt að vinna og við vorum að spila gegn miklu leikreyndara liði en við. Að byrja með nýtt lið og komast í milliriðil. Nú þurfum við að fara upp á hótel og setja upp ný markmið.“

Guðmundur segir að leikjaplanið sé undarlegt. Frakkarnir geta hvílt sig á meðan Ísland spilar gegn bæði Þjóðverjum og Frökkum um helgina. Ekki hægt að breyta þessu núna en verður gert athugasemd við þetta segir Guðmundur.

„Það sem bíður okkar er gríðarlega erfitt prógram. Það er umhugsunarefni að við komum til að spila gegn Þjóðverjum á laugardag og Frakklandi á sunnudag. Það eru fjórir leikir á fimm dögum. Frakkarnir fá að hvíla í tvo daga fyrir leikinn gegn okkur.“

„Þetta er eitthvað sem er algjörlega óskiljanlegt og auðvitað þarf að gera athugarsemdir við þetta á síðari stigum. Það er ekki hægt að breyta því núna en ég er bara að segja að það er erfitt framhald fyrir okkur.“

„Við ætlum að njóta þess og fara til Köln að spila fyrir framan fulla höll. Það er engu líkt,“ sagði Guðmundur að lokum.