Facebook prófar að hjálpa notendum að flytja myndir sínar

Facebook vinnur nú að tilraunum með nýtt tól sem gerir notendum samfélagsmiðla fyrirtækisins að færa myndir sínar til annarra fyrirtækja með auðveldum hætti. Fyrst um sinn munu notendur geta flutt myndir sína á Facebook yfir í Google Photos en það verður ekki mögulegt öllum fyrr en einhvern tímann á fyrri helmingi næsta árs.

Enn sem komið er, er þjónustan eingöngu aðgengileg á Írlandi, samkvæmt yfirlýsingu.



Facebook hefur að undanförnu orðið fyrir miklum þrýstingi frá yfirvöldum um allan heim. Meðal þess sem fyrirtækið hefur verið krafið um snýr að því að Facebook slaki takið á gögnum notenda. Myndir eru þar á meðal.

Fyrirtækið birti skýrslu í september sem fjallar um flutning gagna og persónuvernd. Í inngangi skýrslunnar segir að stjórnmálamenn um heim allan séu á þeirri skoðun að notendur ættu að geta flutt gögn sín frá einni þjónustu til annarrar, þar sem það gæti ýtt undir samkeppni. Hins vegar sé það verulega flókið og nauðsynlegt sé að vernda gögnin.



Áðurnefnt tól Facebook er, samkvæmt tilkynningunni, til komið vegna þessara skýrslu.

Enn fremur segir í yfirlýsingunni að forsvarsmenn Facebook vonist til þess að með þessari aðgerð geti umræðan um gagnaflutning og persónuvernd haldið áfram. Nauðsynlegt sé þó að semja skýrar reglur um hvers konar gögn eigi að vera hægt að flytja á milli fyrirtækja og hver beri ábyrgð á vernd þeirra gagna.