Eldur í rútu á Akureyri

Eldur kom upp í rútu upp við iðnaðarbil á Akureyri skömmu eftir klukkan 18 í kvöld. Eldurinn sem var töluverður kom upp í þeim hluta bæjarins sem ber póstnúmerið 603.

Slökkvilið var kallað á svæðið en samkvæmt upplýsingum frá Slökkviliðinu á Akureyri munaði minnstu að eldurinn, sem var talsverður, næði að berast í iðnaðarbilið sem fylltist af reyk.

Greiðlega gekk að slökkva eldinn sem olli þó skemmdum á iðnaðarhúsnæðinu, nærliggjandi bílum og á rútunni sem er gjörónýt.

Engin slys urðu á fólki vegna eldsvoðans.