Endurkomusigur City gegn Bayern

Manchester City vann 3-2 sigur á Bayern München í vináttuleik í nótt eftir að hafa lent 2-0 undir á innan við hálftíma.

Eftir aðeins 25 mínútur af leiknum sem fór fram í Miami í Bandaríkjunum í nótt var Bayern komið í 2-0. Meritan Shabani og Arjen Robben skoruðu mörk Þýskalandsmeistaranna.

Vond staða varð svo enn verri fyrir Englandsmeistarana þegar Riyad Mahrez, sem liðið keypti fyrir 60 milljónir punda frá Leicester í sumar, meiddist og þurfti að fara af velli.

Í stað Mahrez kom inn á völlinn Portúgalinn Bernardo Silva. Hann skoraði fyrsta markið í endurkomu City og hinn 19 ára gamli Lukas Nmecha jafnaði leikinn.

Það var svo Silva sem tryggði City sigurinn.

Lið City snýr nú aftur til Englands þar sem liðið mætir Chelsea í leiknum um Samfélagsskjöldinn eftir viku.