Gaman að sjá að „tónlistin hafi haft tilætluð áhrif“

Í gær voru norrænu kvikmyndatónskáldaverðlaunin voru í Berlín og íslenska tónskáldið Daníel Bjarnason hlaut þau fyrir tónlist sína við kvikmynd Hafsteins Gunnars Sigurðssonar Undir trénu.

Verðlaunin voru afhent við hátíðlega athöfn. Daníel gat ekki verið viðstaddur og umboðsmaður hans Edna Pletchetero tók því við þeim fyrir hans hönd. Verðlaunin tileinkaði hann félaga sínum, tónskáldinu Jóhanni Jóhannssyni, sem lést þann 9. febrúar.

„Ég gat reyndar ekki farið út því ég er að stjórna upptökum á Sinfóníuhljómsveit Íslands. Ég sendi bara kveðjur með myndbandsupptöku,“ sagði Daníel glaður í bragði þegar blaðamaður náði tali af honum.

Daníel er að vonum himinlifandi með viðurkenninguna. „Þetta er mikill heiður og ánægjulegt að fá þessi verðlaun. Ég vona bara að þau verði til þess að myndin, Undir trénu, fái enn frekari athygli sem og íslensk kvikmynda- og sjónvarpsþáttagerð almennt.“

Dómnefndin rökstuddi verðlaunaafhendinguna með eftirfarandi hætti: „Hin frábæra tónlist Daníels virkar á köflum sem hálfgerð árás á skilningarvit áhorfandans. Upplifunin er unaðslega óþægileg, ef þannig mætti orða það. Hljóðrásin veitir hinni brengluðu kvikmynd aukna dýpt og undirstrikar brothætt sálarlíf persónanna. Tónræn áferð er frumleg og framvinda stefja óvænt. Framúrskarandi kvikmyndatónlist.“

Stöðugt samtal

Spurður út í hvernig honum líði við að lesa umsögn dómnefndar segir Daníel: „Það er alltaf gaman að lesa það sem einhver annar segir. Mér finnst bara gott að fólk noti svona sterk lýsingarorð og að tónlistin hafi haft tilætluð áhrif. Það var alltaf hugsunin hjá mér og Hafsteini að tónlistin væri svolítið afgerandi og væri stór hluti af myndinni þó að hún væri kannski notuð sparlega. Og það held ég að hafi tekist ágætlega.“

Aðspurður nánar út í samstarf hans og Hafsteins Gunnars segir Daníel að þeir hafi verið í stöðugu samtali frá því að myndin var bara handrit. „Við vorum í miklu sambandi alveg frá fyrstu stigum. Við náðum að tala nóg um tónlistina, en svo er alltaf eitt að tala um tónlist og annað að hlusta á hana og búa hana til. Ég gerði nokkuð mikið af skissum og prufum og svo sigtuðum við úr því. Það var mjög gott, að vinna þannig, því Hafsteinn var kominn með nóg af tónlist á meðan hann var enn að klippa myndina.

Þegar Daníel er spurður út í hvort hann ætli að semja meiri kvikmyndatónlist á næstu misserum segir hann: „Já, það er eitthvað í pípunum en ekki beint eitthvað sem ég get talað um akkúrat núna.“