Milwaukee Bucks fór illa með meistara GSW á þeirra eigin heimavelli

Milwaukee Bucks hefur byrjað tímabilið frábærlega í NBA-deildinni í körfubolta og í nótt sýndi liðið að það er engin tilviljun þegar Giannis Antetokounmpo og félagar unnu 23 stiga sigur á meisturum á Golden State Warriors og það í Oakland.

Oklahoma City Thunder þurfti engan Russell Westbrook til að vinna auðveldan sigur á líflausu liði Houston Rockets en Boston Celtics þurfti aftur á móti framlengingu til að vinna Phoenix Suns.

Milwaukee Bucks varð annað liðið til að vinna Golden State á leiktíðinni þegar liðið rasskellti meistarana 134-111 á þeirra eigin heimavelli. Bucks liðið var þrettán stigum yfir í hálfleik, 64-51, og 26 stigum yfir fyrir lokaleikhlutann, 105-79.

Giannis Antetokounmpo þurfti aðeins að spila í 26 mínútur en var með 24 stig, 9 fráköst og 4 stoðsendingar á þeim. Eric Bledsoe var hinsvegar stigahæstur í Milwaukee liðinu með 26 stig á 26 mínútum og Michael Brogdon var með 20 stig.

Klay Thompson var stigahæstur hjá Golden State með 24 stig og Kevin Durant var með 17 stig og 9 stoðsendingar. Stephen Curry meiddist í þriðja leikhluta og spilaði ekki eftir það. Hann var með 10 stig á 26 mínútum. Warriors lék líka án Draymond Green.

Kyrie Irving skoraði 18 af 39 stigum sínum í fjórða leikhluta og framlengingu þegar Boston Celtics vann 116-109 sigur á Phoenix Suns á útivelli. Boston lenti mest 22 stigum undir en tókst að vinna sig aftur inn í leikinn og tryggja sér síðan sigur í framlengingu.

Irving skoraði sex fyrstu stigin í framlengingunni en það var þriggja stiga karfa Marcus Morris sem kom liðinu í hana 1,1 sekúndu fyrir leikslok. Devin Booker skoraði 38 stig fyrir Phoenix liðið.

Paul George skoraði 20 stig fyrir Oklahoma City Thunder sem vann 98-80 sigur á Houston Rockets. Russell Westbrook missti af sínum öðrum leik í röð vegna ökklameiðsla en Thunder liðið hefur nú unnið sjö leiki í röð.

George var einnig með 11 fráköst, 6 stoðsendingar og 6 stolna bolta en Steven Adams bætti við 19 stigum og 10 fráköstum. James Harden skoraði 19 stig fyrir Houston en hitti aðeins úr 7 af 19 skotum sínum.

Úrslitin í NBA-deildinni í nótt:

Golden State Warriors - Milwaukee Bucks 111-134

Portland Trail Blazers - Los Angeles Clippers    116-105    

Phoenix Suns - Boston Celtics    109-116 (100-100)    

Oklahoma City Thunder - Houston Rockets    98-80