Neymar ekki peninganna virði

Brasilíska stórstjarnan, Neymar, segir að hann sé ekki peninganna virði sem hann var keyptur fyrir til PSG frá Barcelona.

Frakkarnir keyptu Neymar á 200 milljónir punda í ágúst síðastliðnum og af því er Neymar ekki stoltur. Hann er nú staddur í Rússlandi þar sem hann berst með Brasilíu á HM.

„Ég er ekki stoltur af því hvað var borgað fyrir mig eða þeirri staðreynd að ég er dýrasti leikmaður í sögunni,” sagði Neymar við vefsíðuna Spox.

„Þetta eru bara peningar og ég get ekki gert neitt. Ég hefði borgað minna fyrir sjálfan mig. Ég er bara ánægður að ég náði æskudraum mínum og það er það sem er mikilvægast fyrir mig.”

„Sem leikmaður þarftu alltaf að sýna þínar réttu hliðar. Þú getur ekki bara vísað í hvað þú kostaðir því það hjálpar þér ekki og segir ekkert til um það hversu góður þú ert í raun og veru,” sagði kappinn ákveðinn.