Orðinn stigahæstur í sögu félagsins aðeins 24 ára gamall

Anthony Davis skrifaði nafn sitt í sögubækur New Orleans Pelicans í nótt er hann setti 43 stig í 114-100 sigri á Oklahoma City Thunder.

Þessi 24 ára framherji varð í kvöld stigahæsti leikmaðurinn í sögu þessa unga félags sem stofnað var árið 2012. Setti hann niður stutt skot í fjórða leikhluta sem sjá má hér fyrir neðan og hirti metið með því.

Tók hann með því fram úr David West sem lék í átta ár með félaginu en leikur þessa dagana sem varaskeifa hjá Golden State Warriors.

Óhætt er að segja að hann muni eflaust eiga flest met sem skráð eru hjá félaginu ef hann leikur út ferilinn en hann er nú þegar með flest stig, flest fráköst, flest varin skot ásamt fleiri tölfræðiþáttum.

Say hello to the new franchise leading scorer @antdavis23! #DoItBig pic.twitter.com/nBar7WUOU2

— New Orleans Pelicans (@PelicansNBA) February 3, 2018