Gunnhildur Yrsa og stöllur hennar eiga enn möguleika á úrslitakeppni

Landsliðskonan Gunnhildur Yrsa Jónsdóttir lék allan leikinn fyrir Utah Royals þegar liðið heimsótti botnlið Sky Blue í New Jersey í gær í bandarísku úrvalsdeildinni í fótbolta.

Heimakonur komust óvænt í 2-0 en liðið er langneðst í deildinni með aðeins fimm stig og er enn án sigurs eftir nítján leiki.

Gunnhildur Yrsa og stöllur hennar gáfust ekki upp og náðu inn jöfnunarmarki í uppbótartíma þegar bandaríska landsliðskonan Amy Rodriguez skoraði.

Jafnteflið heldur voninni um sæti í úrslitakeppni á lífi en Utah Royals er tveimur stigum frá fjórða sætinu og á tvo leiki eftir í deildarkeppninni.

Liðin fyrir ofan eiga hins vegar einn leik til góða og því ljóst að margt þarf að falla fyrir Utah Royals á lokasprettinum til að liðið verði meðal þeirra fjögurra efstu. Fjögur efstu liðin fara í úrslitakeppni um bandaríska meistaratitilinn.

Deep, deep into stoppage time, @UtahRoyalsFC find the equalizer from @AmyRodriguez8. #NJvUTA | #NWSL pic.twitter.com/uFlFbLS6K5

— NWSL (@NWSL) August 19, 2018