Þannig hljóðar útgangspunktur Víkverja í Morgunblaði dagsins þar sem ónefndur penni elsta starfandi dagblaðs landsins rifjar upp kynni sín af alnæmi við fermingaraldur. Þá hafi alæmni ruðst inn í tilveruna að sögn Víkverja.
„Samkynhneigðir og fíkniefnaneytendur voru í sérstökum áhættuhópi og unglingar því beðnir um að fara varlega í ástarlífinu. Ekkert væri hægt að gera fyrir þá sem veiktust af Aids.“

„Meðal viðbragða við vá þessari var að smokkasjálfsalar voru settir upp út um borg og bý og góðhjartaðar hjúkrunarkonur fluttu fyrirlestra í skólum.“
Gefur Víkverji í framhaldinu í skyn að áhyggjurnar hafi mögulega verið úr hófi.
Halldór Auðar Svansson pírati segir að skrifin eigi skilið sérstök hálfvitaverðlaun. Þau séu ævintýralega heimskuleg.
„Það er ekkert sérstaklega flókið mál að núorðið er sjaldan minnst á alnæmi á Vesturlöndum nákvæmlega vegna þess að brugðist var við með öflugum fyrirbyggjandi aðgerðum. Annars staðar, svo sem víða í Afríku, þar sem stjórnvöld hafa jafnvel sums staðar misst sig í að ýta undir afneitun á vísindalegum staðreyndum um alnæmi, er það ennþá mikið og banvænt vandamál,“ segir Halldór Auðar.

„Vanvirðingin í garð þeirra sem hafa unnið þrekvirki í að koma í veg fyrir alnæmisfaraldur á heimsvísu er síðan sérstök svívirða út af fyrir sig. Þetta er svona svipað og að efast um gildi slökkviliða af því það sé ekki nægilega algengt að hús brenni til grunna.“
Um sé að ræða grafskrift þess forréttindablinda, á þá leið að fyrst að maður finni ekki fyrir vandamáli þá stundina geti það ekki verið vandamál.
Í árslok 2017 höfðu samanlagt 389 tilfelli af HIV-sýkingu verið tilkynnt til sóttvarnarlæknis samkvæmt upplýsingum á vef Landlæknis. Þar af höfðu 73 sjúklingar greinst með alnæmi og 39 látist af völdum sjúkdómsins. 28 tilfelli af HIV-sýkingu komu upp á Íslandi árið 2017.