Þrjú Íslendingalið í 16-liða úrslitum Meistaradeildarinnar

Lillestrøm er komið áfram í 16-liða úrslit Meistaradeilar kvenna eftir 1-0 sigur á Zvezda Perm í síðari leik liðanna en leikið var í Moskvu.

Sigríður Lára Garðarsdóttir var á varamannabekknum hjá Lilleström en hún spilaði síðustu tuttugu mínúturnar í leiknum.

Eina mark leiksins skoraði hin norska Emilie Haavi á 52. mínútu en Lilleström vann fyrri leikinn 2-0 á heimavelli. Samanlagt því 3-0 sigur hjá Sigríði og Lilleström.

Það verða því þrjú Íslendingalið í 16-liða úrslitunum því Wolfsburg, lið Söru Bjarkar Gunnarsdóttur og Rosengård, lið Glódísar Perlu Viggósdóttur, eru einnig komið í 16-liða úrslitin.