Mentis Cura semur við fyrirtæki í Japan

Íslensk-norska heilbrigðistæknifyrirtækið Mentis Cura hefur undirritað samning við japanska fyrirtækið Nihon Medi-Physics um þróun og markaðssetningu á greiningartækni félagsins í Japan.

Þetta kemur fram í tilkynningu frá Mentis Cura, en fyrirtækið framleiðir hugbúnað sem nýtir gervigreind og EEG-heilarit til greiningar á heila- og miðtaugakerfissjúkdómum, svo sem Alzheimer, Huntington-sjúkdóms og ADHD. Samningurinn er sagður geta skilað félaginu 14 milljörðum íslenskra króna á næstu tíu árum að því er fram kemur í tilkynningunni.

„Áður en hægt er að setja hugbúnaðinn á markað í Japan þarf hann að fara í gegnum klíníska rannsókn þar í landi og hljóta viðurkenningu japanskra stjórnvalda, en að þeim skilyrðum uppfylltum er ljóst að tekjumöguleikarnir eru verulegir. Japanir eru fjölmenn þjóð sem nær háum meðalaldri og heilabilanir stórt og útbreytt vandamál og NMP öflugur samstarfsaðili.

Mentis Cura var stofnað á Íslandi árið 2004 af Kristni Johnsen, vísindamanni og frumkvöðli. Rannsóknar- og þróunarstarf félagsins fer fram á Íslandi, en höfuðstöðvar þess fluttust til Oslóar árið 2016. Á annan tug starfsmanna vinna hjá fyrirtækinu á Íslandi, í Noregi og í Japan.

Auk samningsins í Japan hafa vörur Mentis Cura verið í notkun á Íslandi um árabil og samið hefur verið við dreifingaraðila á Ítalíu þar sem gert er ráð fyrir að vörurnar farið í notkun snemma árs 2019,“ segir í tilkynningunni.