Já, slátrum endilega mjólkurkúnni

Erlendir ferðamenn eyða miklum peningum þegar þeir dvelja hér á landi og ríkissjóður hagnast verulega á þeirri eyðslu. Gróflega áætlað skiluðu erlendir ferðamenn 46 milljarða króna virðisaukaskatti í fyrra. Það voru 20% af tekjum ríkisins af virðisaukaskatti. Ekki slæmt að hafa þessa nýju skattgreiðendur. Ekki fá þeir mikið í staðinn. Ekki ganga þeir í skóla hér eða þiggja aðstoð frá hinu opinbera.

Tekjur ríkisins af erlendum ferðamönnum hafa farið hratt vaxandi. Hluti ferðaþjónustunnar sem stóð utan við virðisaukaskattskerfið var tekin þar inn árið 2016. Við það jukust virðisaukaskattstekjur ríkissjóðs af erlendum ferðamönnum um meira en tuttugu milljarða á milli áranna 2015 og 2017.

Vofa Samfylkingarinnar gengur ljósum logum

Þrátt fyrir þetta myndarlega framlag útlendinga í ríkissjóð hefur Samfylkingin enn einu sinni lagt til að kafa dýpra í vasa ferðamanna með skattahækkunum. Það hækkar auðvitað kostnað ferðamanna. En líkt og fyrri daginn hefur Samfylkingin ekkert spáð í hvaða áhrif það getur haft.

Samfylkingin virðist ekki hafa séð fréttirnar um fækkun ferðamanna á landsbyggðinni og styttri dvalartíma þeirra vegna þess hvað kostnaðurinn við Íslandsferðina hefur hækkað mikið. Samfylkingin heldur að það sé í lagi að hækka þennan kostnað enn meir.

Samfylkingin virðist ekki hafa frétt af því að ferðaþjónustan stendur undir helmingnum af hinum mikla hagvexti og uppbyggingu hér á landi undanfarin ár. Samfylkingunni virðist slétt sama þó að skattahækkun fæli erlenda ferðamenn í burtu í stríðum straumum og stefni efnahagslegum ávinningi þjóðfélagsins í hættu. Samfylkingunni virðist slétt sama þótt mjólkurkúnni verði slátrað til þess eins að geta yfirboðið aðra stjórnmálaflokka í útgjaldaloforðum.

Hættulegt að leggja meiri skatta á erlenda ferðamenn

Frá 2012 til 2017 fjölgaði íbúum hér á landi um 6%. Á sama tíma rúmlega þrefaldaðist fjöldi erlendra ferðamanna og VSK tekjur ríkissjóðs jukust um 44%. Það þarf engan stærðfræðisnilling til að sjá hvaðan þessar auknu VSK tekjur komu aðallega.

Þann tíma sem erlendur ferðamaður dvelst hér á landi skilar hann tvöfalt meiri VSK tekjum til ríkisins en heimamaður. Það er stórhættulegt að halda að erlendir ferðamenn taki því þegjandi að láta skattleggja sig enn frekar. Þeir hafa val um hvort þeir borga háa skatta hér á landi eða hóflegri skatta annars staðar. Þeir sleppa því einfaldlega að koma hingað.

Við þurfum ekki að ná meiri sköttum af erlendum ferðamönnum. Miklu frekar þurfum við að leggja eitthvað af þessum fjármunum til að þeir haldi áfram að koma. Þörf er fyrir úrbætur í vegamálum, aukna stígagerð, fjölgun bílastæða og salerna á vinsælum ferðamannastöðum svo dæmi séu nefnd. Í fyrra lagði ríkissjóður 600 milljónir króna í framkvæmdasjóð ferðamannastaða. Þetta er stærsti útgjaldaliður ríkisins vegna ferðamanna og nemur aðeins um 1,3% af VSK tekjunum ef erlendu ferðamönnunum. 

Höfundur er stjórnarformaður Gray Line.