Viðskipti erlent

Greiddi sér 115 milljónir í laun á dag

Stefán Ó. Jónsson skrifar
Denise Coates hlaut CBE-tign fyrir framlag sitt til bresks samfélags og viðskiptalífs árið 2012.
Denise Coates hlaut CBE-tign fyrir framlag sitt til bresks samfélags og viðskiptalífs árið 2012. Vísir/getty

Stofnandi og forstjóri veðmálafyrirtækisins Bet365 greiddi sér 265 milljónir sterlingspunda í laun á síðasta ári. Það gera árslaun upp á næstum 42 milljarða íslenskra króna, eða 115 milljón krónur á dag.

Um er að ræða hæstu laun sem nokkur yfirmaður bresks fyrirtækis hefur greitt sér á einu ári. Fyrra met, 217 milljón punda árslaun, var sett í fyrra. Handhafi þess mets var einnig umræddur forstjóri, Denise Coates.

Hún hóf starfsferil sinn sem gjaldkeri í einni af veðmálabúllum föður hennar, Peter Coates. Hún tók síðar við stjórnartaumunum í fyrirtækinu og hefur leitt vöxt þess á síðustu árum. Til að mynda er hún sögð bera ábyrgð á því að Bet365 hafi veðjað á internetið sem framtíðarheimili veðmála. Óhætt er að segja að sú ágiskun hafi borgað sig fyrir Coates-fjölskylduna en nú er svo komið að Bet365 er eitt stærsta veðmálafyrirtæki heims. Coates og fjölskylda hennar eru í 21. sæti yfir auðugustu Bretana en auðæfi þeirra eru metin á um 5,8 milljarða punda.

Tvöfaldur launakostnaður Stoke City

Fram kemur í umfjöllun The Guardian um málið að grunnlaun Coates hafi verið 224 milljón pund en ofan á þau bættust arðgreiðslur upp á ríflega 45 milljón pund. Coates á um helmingshlut í Bet365 sem hagnaðist um 660 milljón pund á síðasta ári.

Breskum blaðamönnum reiknast til að laun Coates séu 9500-falt hærri en meðallaun þar í landi og 1300-falt hærri en laun forsætisráðherrans, Theresu May. Til gamans eru laun hennar borin saman við launakostnað breska knattspyrnuliðsins Stoke City, sem er í eigu Bet365 og féll úr úrvalsdeildinni á síðasta tímabili. Ef öll laun, allra leikmanna liðsins á síðasta ári eru lögð saman þá væru þau samt innan við helmingur þeirra launa sem Coates greiddi sér í fyrra.

Hún hefur ekki viljað tjá sig um launagreiðslu sína við þarlenda fjölmiðla. Þó er haft eftir henni í yfirlýsingu sem fylgdi síðasta ársreikningi Bet365 að vöxtur fyrirtækisins hafi verið gríðarlegur á síðasta ári. Heildartekjur hafi aukist um 25% á mili ára, en alls veðjuðu viðskiptavinir fyrirtækisins fyrir 52,3 milljarða punda í fyrra.

Í umfjöllun Guardian er launagreiðsla Coates sett í samhengi við þann mikla veðmálavanda sem Bretar standa frammi fyrir. Til að mynda hafi fjöldi barnungra spilafíkla fjórfaldast í landinu á síðastliðnum tveimur árum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ORIGO
1,8
2
677
BRIM
0
0
0
HEIMA
0
1
1.218

Mesta lækkun dagsins


Félag
Br.%
Fjöldi
Velta*
SIMINN
-2,9
12
190.976
KVIKA
-2,8
8
47.966
ARION
-2,54
34
992.823
ICEAIR
-2,17
18
37.233
VIS
-1,93
9
87.062
Velkomin á Vísi. Þessi vefur notar vafrakökur. Sjá nánar.