Viðskipti innlent

Engin breyting á rekstri WOW air að sögn Skúla

Kjartan Kjartansson skrifar
Jóna Lovísa Jónsdóttir, prestur á Akureyri og fitnessmeistari, opnaði vef WOW Air og blessaði fyrirtækið á blaðamannafundi í nóvember 2011
Jóna Lovísa Jónsdóttir, prestur á Akureyri og fitnessmeistari, opnaði vef WOW Air og blessaði fyrirtækið á blaðamannafundi í nóvember 2011 Fréttablaðið/Anton Brink

Wow air mun halda óbreyttum rekstri sem sjálfstætt dótturfélag Icelandair Group. Þetta er á meðal þess sem kemur fram í bréfi sem Skúli Mogensen, forstjóri og eigandi Wow air, sendi starfsmönnum flugfélagsins í dag eftir að tilkynnt var um kaup Icelandair á því.

Kaupsamningur flugfélaganna tveggja felur í sér að Icelandair Group eignist allt hlutafé í Wow air. Það hefur fram að þessu verið að fullu í eigu Skúla. Kaupin eru háð fyrirvara um að hluthafafundur Icelandair Group samþykki þau, samþykki Samkeppniseftirlitsins og niðurstöðu áreiðanleikakönnunar.

Í bréfi sínu til starfsmanna sem sent var á ensku segist Skúli áætla að ferlið gæti tekið þrjár vikur. Hann segist gera sér grein fyrir að tilkynningin sé mörgum áfall. Salan til Icelandair Group hafi ekki verið í upphaflegri áætlun hans. Vísar hann hins vegar til erfiðra „ytri aðstæðna“ sem hafi aðeins versnað.

Skúli fullyrðir að engin breyting verði á daglegum rekstri Wow air sem muni áfram þjóna farþegum og áfangastöðum sem félagið hefur verið með.

„Ég hvet ykkur til þess að líta á þetta sem tækifæri til að halda ferð okkar áfram núna sem hluta af miklu sterki heild sem gerir okkur kleift að ná árangri til lengri tíma litið,“ segir í bréfinu.

Bréf Skúla Mogensen til starfsmanna Wow air í íslenskri þýðingu Vísis:

Kæru vinir

Þegar við byrjuðum með Wow air fyrir sjö árum árum hefði ég aldrei getað ímyndað mér þau ótrúlegu ævintýri sem Wow air hefur verið. Við höfum breytt fluglandslaginu á Íslandi varanlega og sett Wow air á kortið sem frumkvöðul í lágfargjaldaflugfélögum á lengri leiðum yfir Atlantshaf. Ég er ótrúlega stoltur af öllu sem við höfum áorkað og af frábæra WOW-teyminu.

Það hafa verið margir sigrar en líka meiriháttar áskoranir. Þetta ár hefur verið sérstaklega krefjandi í samanburði við ótrúlegan vöxt og velgengni sem við höfum notið undanfarin ár. Því miður hefur ytri aðstæðum haldið áfram að hraka og útlitið fyrir mörg flugfélög hefur orðið gríðarlega slæmt. Wow air er engin undantekning og þrátt fyrir að við höfum unnið myrkranna á milli til þess að bæta horfurnar stöndum við nú frammi fyrir gríðarlega erfiðum ákvörðunum.

Niðurstaðan er að Icelandair Group kaupir Wow air og við verðum sjálfstætt dótturfélag Icelandair Group. Kaupin eru ennþá háð samþykkti hluthafa Icelandair Group og samþykki Samkeppniseftirlitsins. Þetta mun taka um það bil þrjár vikur.

Við höfum unnið stíft að því með Icelandair Group-teyminu undanfarna 48 klukkutíma að tryggja að við getum nýtt þetta tækifæri sem best. Það verður engin breyting á daglegum rekstri okkar og við munum halda áfram að þjóna farþegum okkar og áfangastöðum eins og áður með því markmiði að halda áfram að bjóða upp á lægstu fargjöldin til og frá Íslandi og yfir Atlantshafið.

Ég geri mér grein fyrir því að þetta verður mörgum ykkar áfall og augljóslega var þetta ekki hluti af upphaflegu áætluninni. Engu að síður, vegna aðstæðna tel ég að þetta sé besta lausnin fyrir teymið okkar, farþegana okkar, tilvist Wow air sem lágfargjaldaflugfélags og ekki síst ferðaþjónustuiðnaðinn á Íslandi. Ég hvet ykkur til þess að líta á þetta sem tækifæri til að halda ferð okkar áfram núna sem hluta af miklu sterki heild sem gerir okkur kleift að ná árangri til lengri tíma litið.

Þakka ykkur öllum fyrir frábær störf ykkar. Það verður starfsmannafundur kl. 12:30 á sjöunda hæð höfuðstöðvanna. Ég vonast til þess að sjá ykkur þar.


Tengdar fréttir

Icelandair kaupir WOW air

Stjórn Icelandair Group hefur gert kaupsamning um kaup á öllu hlutafé í flugfélaginu WOW air. Kaupin eru m.a. gerð með fyrirvara um samþykki hluthafafundar Icelandair Group, samþykki Samkeppniseftirlitsins og niðurstöðu áreiðanleikakönnunar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*

Mesta lækkun dagsins


Félag
Br.%
Fjöldi
Velta*
Velkomin á Vísi. Þessi vefur notar vafrakökur. Sjá nánar.