Viðskipti innlent

Eftir ókyrrð í lofti flaug WOW í fang Icelandair

Sunna Kristín Hilmarsdóttir skrifar
Frá höfuðstöðvum WOW air í Katrínartúni.
Frá höfuðstöðvum WOW air í Katrínartúni. vísir/vilhelm

Það er ekki ofsögum sagt að það hafi gustað um flugfélagið WOW air undanfarna mánuði en í dag var tilkynnt að fyrirtækið verði selt Icelandair Group, að uppfylltu samþykki hluthafafundar, samþykki Samkeppniseftirlitsins og niðurstöðu áreiðanleikakönnunar.

WOW air hafði undanfarið glímt við fjárhagserfiðleika en þann 18. september síðastliðinn var tilkynnt að félagið hefði lokið við 60 milljóna evra fjármögnun, eða sem samsvaraði um 7,7 milljörðum króna, í skuldabréfaútboði. Greint hafði verið frá því í ágúst að félagið hefði í hyggju að ráðast í útboðið.

Í Fréttablaðinu sagði að WOW air ætlaði sér að sækja fjármagn til þess að treysta starfsemi fyrirtækisins með útgáfu þriggja ára skuldabréfs við evrópska fjárfesta.

Norska verðbréfafyrirtækið Pareto Securities hafði umsjón með útboðinu en WOW air ætlaði að sækja allt að þrettán milljarða króna í útboðinu, eða sem samsvaraði um 100 milljónum evra.

Skúli Mogensen stofnaði WOW air í nóvember 2011. vísir/getty

Ýmsar nýjar upplýsingar um fjárhagsstöðu félagsins í fjárfestakynningu

Eins og greint var frá í kvöldfréttum Stöðvar 2 sama dag og fyrst var sagt frá skuldabréfaútboðinu komu ýmsar nýjar upplýsingar fram um rekstur WOW air í fjárfestakynningu sem félagið lét vinna í tengslum við skuldabréfaútboðið.

Þannig kom fram að WOW air hefði tapað 45 milljónum dollara, jafnvirði 4,9 milljarða króna, á tímabilinu frá júlí 2017 til júní 2018. Þá sagði jafnframt í kynningunni að eigið fé flugfélagsins hefði aðeins numið 14 milljónum bandaríkjadala, jafnvirði rúmlega eins og hálfs milljarðs króna, í lok júní á þessu ári en í árslok 2016 hafði eigið fé fyrirtækisins verið 5,9 milljarðar 2016.
 
Einnig mátti lesa það út úr fjárfestakynningunni að handbært eigið fé WOW air væri býsna lítið, eða aðeins um sex milljónir dollara í lok júní á þessu ári. Til samanburðar áttið Icelandair Group um 237 milljónir dollara í handbært eigið fé á sama tíma.

Þá var einnig sá munur á rekstri íslensku flugfélaganna tveggja að WOW air leigði allan flugflota félagsins, alls tuttugu Airbus-þotur, en Icelandair á stóran hluta eigin flugflota.

WOW air verður sjálfstætt starfandi dótturfyrirtæki Icelandair Group. Vísir/Vilhelm

Kaupverðið rúmir tveir milljarðar en ekki 44

Skuldabréfaútboðið var hugsað sem brúarfjármögnun fram að fyrirhuguðu hlutafjárútboði og skráningu WOW air á markað sem fara átti fram innan átján mánaða.

Í tengslum við þær fyrirætlanir sagði Skúli Mogensen að hann byggist við að ná um 22 til 33 milljörðum króna ef hann myndi bjóða út helming hlutafjár WOW air. Hann vildi ekki gefa upp hvert hann vonaðist til að heildarvirði fyrirtækisins yrði en ætla mátti að það væri að lágmarki 44 milljarðar króna.
 
Icelandair Group keypti WOW air hins vegar á rúma tvo milljarða króna sé miðað við 5,4 prósent hlutafjár Icelandair Group sem hluthafar WOW air eignast eftir kaupin. Markaðsvirði Icelandair Group er 38 milljarðar króna. Í lok september síðastliðins var eigið fé Icelandair Group 575 milljónir dollara og handbært fé 175 milljónir dollar. 

Jóna Lovísa Jónsdóttir, prestur á Akureyri og fitnessmeistari, opnaði vef WOW Air og blessaði fyrirtækið á blaðamannafundi í nóvember 2011. Fréttablaðið/Anton Brink

Miðað við skilmála skulabréfaútboðsins sem fréttastofa hefur undir höndum verða skuldabréfin ekki gjaldfelld við kaupin þar sem WOW air verður sjálfstætt starfandi dótturfélag Icelandair. 

Þá breyta kaup Icelandair Group á WOW air engu um stöðu þeirra sem tóku þátt í skuldabréfaútboðinu. Það eina sem breytist, verði kaupin samþykkt af öllum hlutaðeigandi, er að nýr eigandi WOW air er fjársterkt fyrirtæki á markaði og eru líkur á vanefndum því litlar sem engar. 

Gangi kaupin í gegn verður aftur horfið til þess tíma þegar aðeins eitt íslensk flugfélag var í millilandaflugi. Breytingin sem hefur hins vegar orðið á síðustu árum frá því sem áður var er að fjöldi erlendra flugfélaga flýgur hingað til lands allan ársins hring. Engu að síður eru Icelandair og WOW air með um 80 prósent markaðshlutdeild af flugferðum á Keflavíkurflugvelli.


Tengdar fréttir

Icelandair kaupir WOW air

Stjórn Icelandair Group hefur gert kaupsamning um kaup á öllu hlutafé í flugfélaginu WOW air. Kaupin eru m.a. gerð með fyrirvara um samþykki hluthafafundar Icelandair Group, samþykki Samkeppniseftirlitsins og niðurstöðu áreiðanleikakönnunar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*

Mesta lækkun dagsins


Félag
Br.%
Fjöldi
Velta*
Velkomin á Vísi. Þessi vefur notar vafrakökur. Sjá nánar.