Viðskipti innlent

Kóreskur leikjaframleiðandi kaupir CCP á 46 milljarða króna

Sunna Kristín Hilmarsdóttir skrifar
CCP var stofnað árið 1997. Fyrirtækið gefur út leikinn EVE Online sem hefur notið mikilla vinsælda undanfarin ár.
CCP var stofnað árið 1997. Fyrirtækið gefur út leikinn EVE Online sem hefur notið mikilla vinsælda undanfarin ár.
Kóreski leikjaframleiðandinn Pearl Abyss hefur keypt íslenska tölvuleikjaframleiðandann CCP. Kaupverðið nemur alls 425 milljónum dala sem samsvarar um 46 milljörðum íslenskra króna.

Í tilkynningu vegna sölunnar kemur fram að samkvæmt samningnum sem fyrirtækið hafa undirritað mun CCP áfram starfa sem sjálfstæð heild og halda óbreyttum rekstri í Reykjavík, London og Sjanghæ.

CCP var stofnað árið 1997. Fyrirtækið gefur út leikinn EVE Online sem hefur notið mikilla vinsælda undanfarin ár. Pearl Abyss var stofnað árið 2010 og gefur meðal annars út leikinn Black Desert Online.

„Frá því að Pearl Abyss var skráð á hlutabréfamarkað árið 2017 hefur fyrirtækið unnið markvisst að því að kaupa alþjóðlega leikjafyrirtæki á borð við CCP til að vaxa enn hraðar á heimsvísu. Verðmæti fyrirtækisins við síðustu viðskipti í kóresku kauphöllinni var jafnvirði ríflega 300 milljarða íslenskra króna. Pearl Abyss sló tekjumet á fyrri helmingi þessa árs þegar farsímaútgáfa Black Desert Mobile kom út í Kóreu,“ segir í tilkynningu vegna kaupanna.

Þar er jafnframt haft eftir Hilmari Veigari Péturssyni, forstjóra CCP, að hann hafi verið aðdáandi Pearl Abyss allt frá því að hann skoðaði Black Desert Online vefsíðuna fyrst. Í kjölfarið hafi hann spilað leikinn oft og mörgum sinnum.

„Pearl Abyss er eitt mest spennandi og hraðvaxandi fyrirtækið í leikjaiðnaðnum í dag. Það hefur margt nýtt fram að færa hvað varðar tækni, getu og framtíðarsýn. Ég held að fyrirtækin geti lært mikið hvort af öðru. Við erum spennt að taka saman höndum með þeim og ná nýjum hæðum með bæði fyrirtækin, leikina sem við þróum og - það sem mestu skiptir – spilarana okkar,“ segir Hilmar Veigar.


Tengdar fréttir

Rannsókn á samfélagi EVE Online spilara

Heimildarmyndin Even Asteroids are not alone er fyrsta mynd Jóns Bjarka Magnússonar en hann gerði hana sem hluta af meistaranámi sínu í sjónrænni mannfræði.

Yfirframleiðandi segir skilið við CCP

Andie Nordgren, yfirframleiðandi geimtölvuleiksins EVE Online, hefur ákveðið að segja skilið við CCP. Uppsögn hennar tekur gildi í júní.






Fleiri fréttir

Sjá meira


×