Wow Air býst við 96% betri afkomu á síðari helmingi ársins

Wow Air reiknar með því að afkoma félagsins batni um 96 prósent á síðari helmingi ársins miðað við sama tíma í fyrra. Þetta kemur fram í uppfærðri fjárfestakynningu félagsins vegna skuldabréfaútboðs sem nú stendur yfir. Icelandair er að spá 33 prósent lakari afkomu á sama tímabili.

Wow Air tapaði 45 milljónum dollara, jafnvirði 4,8 milljarða króna, á tímabilinu frá júlí í fyrra til 30. júní á þessu ári. Fyrirtækið freistar þess nú að sækja sér lánsfé með skuldabréfaútboði.

Fréttablaðið greindi frá því í dag að fjárfestar sem tækju þátt í skuldabréfaútboði Wow Air myndu einnig fá kauprétt að hlutabréfum félagsins þegar það verður skráð á hlutabréfamarkað innan tveggja ára á 20 prósent lægra gengi en skráningargengi þegar þar að kemur. 

Það er norska verðbréfafyrirtækið Pareto Securities sem sér um skuldabréfaútboðið sem nú stendur yfir. Í fjárfestakynningu vegna útboðsins koma fram áætlanir um rekstrarhagnað Wow Air á síðari hluta þessa árs. Til þess að skilja hversu raunhæfar þessar áætlanir eru er hægt að bera þær saman við sömu spár hjá Icelandair.

Í afkomuviðvörun Icelandair sem birt var á mánudag kom fram að spá gerði ráð fyrir að rekstrarhagnaður félagsins fyrir skatta, afskriftir og fjármagnsliði (EBITDA) yrði 80-100 milljónir dollara á þessu ári. Félagið tapaði 3,5 milljónum dollara á fyrri helmingi þessa árs. Ef miðað er við miðgildið í spánni fyrir árið í heild, 90 milljónir dollara, þá þarf rekstrarhagnaður Icelandair að vera 93,5 milljónir dollara á síðari helmingi þessa árs til að spáin gangi eftir. Það er samdráttur upp á 33 prósent frá sama tímabili í fyrra en rekstrarhagnaður Icelandair fyrir skatta afskriftir og fjármagnsliði nam 139,6 milljónum dollara á síðari helmingi ársins 2017.

Í uppfærðri fjárfestakynningu fyrir Wow Air, sem nýverið birtist á vef Pareto Securities, kemur fram að rekstrarhagnaður Wow Air fyrir skatta, afskriftir og fjármagnsliði hafi numið 19 milljónum dollara á síðari helmingi ársins 2017 en félagið búist við 37 milljóna dollara rekstrarhagnaði á síðari helmingi þessa árs. Þetta er aukning upp á 96 prósent milli ára. 

Í hnotskurn er Wow Air að búast við 96 prósent betri afkomu á seinni helmingi þessa árs á sama tíma og Icelandair býst við 33 prósenta samdrætti. Wow Air hyggst ná þessu aðallega með því að fjölga seldum flugsætum í svokölluðum premium verðflokki samkvæmt fjárfestakynningunni.