Skellur í fyrsta leik Emils með Frosinone

Emil Hallfreðsson spilaði sinn fyrsta leik fyrir Frosinone er liðið tapaði 4-0 á útivelli fyrir Atalanta í fyrstu umferð ítölsku úrvalsdeildarinnar.

Það byrjaði ekki vel fyrir Emil og félaga því á fjórtándu mínútu kom Alejandro Gomez heimamönnum í Atalanta yfir. Þannig stóðu leikar í hálfleik.

Í upphafi síðari hálfleiks tvöfaldaði Atalanta forystuna er Hans Hateboer skoraði og þrettán mínútum síðar varð staðan 3-0 með marki Mario Pasalic.

Atalanta voru ekki hættir því í uppbótartíma skoraði Gomez annað mark sitt og fjórða mark Atalanta. Lokatölur 4-0 tap í fyrsta leik Emils og Frosinone í úrvalsdeildinni en liðið er nýliði í deildinni.

Emil kom frá Udinese til Frosinone í sumar en hann spilaði allan leikinn fyrir Frosinone. Næsti leikur Frosinone er gegn Bologna á heimavölli um næstu helgi.