11 kílóa urriði úr Þingvallavatni

Þingvallavatn hefur verið að gefa mjög góða bleikjuveiði í sumar en þó svo það sé að líða að lokum veiðitímans í vatninu er langt frá því að vera lítil veiðivon.

Við höfum verið að fá fréttir að veiðimenn hafi verið varir við urriða í þjóðgarðinum og að hann hafi verið að sýna sig mikið á nokkrum stöðum.  Frá Veiðikortinu höfum við heyrt af veiðimönnum síðustu vikuna sem hafa verið að fá fallega urriða þar. Í gærkvöldi fór Cesary Fijalkowski í þjóðgarðinn til að kanna málið.  Hann sagði að það væri óvenju mikið af urriða í þjóðgarðinum og fékk hann 7 urriða allt frá 3kg upp í 11kg! Hann hóf veiðar um kl. 22.00 og veiddi til 4 um nóttina. Það er nefnilega þannig með urriðann að það er langbest að veiða hann í í ljósaskiptunum og fram í myrkur.  Veiðimenn sem ætla sér að láta reyna á urriðann stóra sem virðist vera að taka núna eru beðnir um að sleppa stóra fiskinum.