Tvenna Wayne Rooney skaut DC af botninum

Enska goðsögnin Wayne Rooney virðist vera búinn að finna fjölina í bandaríska fótboltanum en hann var á skotskónum í nótt þegar sigurganga DC United hélt áfram.

Rooney átti stóran þátt í dramatískum sigri á Orlando City um síðustu helgi og var svo allt í öllu í 4-1 sigri á Portland Timbers í nótt.

DC United lenti undir eftir rúmlega hálftíma leik en Rooney jafnaði metin skömmu fyrir leikhlé. 

Rooney og félagar voru svo töluvert sterkari í síðari hálfleik og unnu að lokum 4-1 sigur en Rooney skoraði annað mark sitt þegar hann kom DC í 3-1 með marki beint úr aukaspyrnu.

DC United skaust þar með af botni Austurdeildarinnar en liðið hefur verið á miklu flugi að undanförnu og er taplaust í síðustu fjórum leikjum sínum, þar af hafa þrír þeirra unnist.

Helstu atriði leiksins í nótt má sjá hér fyrir neðan.