Stjóri Lyon óviss um framtíð Fekir

Franski sóknartengiliðurinn Nabil Fekir hefur verið orðaður við brottför frá Lyon í allt sumar og stjóri liðsins, Bruno Genesio, kveðst ekki vera viss um framtíð kappans.

Fekir var ekki með Lyon í gær þegar liðið mætti Chelsea í æfingaleik á Stamford Bridge og fjölmiðlar spurðu út í stöðuna á Fekir sem hefur meðal annars verið orðaður við Liverpool.

„Það er of snemmt að segja til um það. Hann vildi fara í lok síðasta tímabils en hann mætti til æfinga í gær og var glaður,“ sagði Genesio.

„Hver veit? Það gætu komið upp tækifæri áður en glugginn lokar. Eins og er, er hann leikmaður Lyon,“ sagði Genesio.