Cosby og Polanski reknir úr Óskarsakademíunni vegna kynferðisbrota

Gunnar Hrafn Jónsson skrifar 3. maí 2018 21:28

Tugir kvenna hafa sakað Cosby um nauðgun Vísir/EPA

Bandaríska kvikmyndaakademían, Academy of Motion Picture Arts and Sciences, hefur rekið Bill Cosby og Roman Polanski úr akademíunni fyrir kynferðisbrot. Helsta hlutverk akademíunnar er að veita Óskarsverðlaunin á ári hverju.

Í tilkynningu segir að stjórn akademíunnar hafi greitt atkvæði um málið og meirihlutinn ákveðið að Cosby og Polanski hefðu báðir gerst brotlegir við siðferðisreglur með hegðun sinni. Cosby var á dögunum dæmdur fyrir nauðgun og Polanski viðurkenndi kynferðisbrot gegn ungri stúlku árið 1977.

Alls hafa aðeins fjórir menn verið reknir úr kvikmyndaakademíunni frá því að hún var stofnuð fyrir rúmum níutíu árum. Sá fyrsti var leikarinn Carmine Caredi árið 2004 en hann lak afrituðum kvikmyndum sem hann fékk til skoðunar á DVD diskum fyrir kvikmyndahátíðina. Harvey Weinstein var síðan rekinn á dögunum vegna fjölda ásakana um kynferðisbrot og nú bætast við Cosby og Polanski.

Mál Bill Cosby Óskarinn Kynferðisofbeldi MeToo

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.