„Fangelsismálastofnun hefði ekki flutt fangann í opið fangelsi ef það hefði talið strokhættu af manninum,“ segir Páll í samtali við Vísi.
Sindri Þór Stefánsson, sem er undir rökstuddum grun lögreglu um aðild að einhverju umfangsmesta þjófnaði hér á landi, strauk af Fangelsinu Sogni aðfarnaótt þriðjudags og flúði land á þriðjudagsmorgun.
Bar fyrir sig geðrænum vanda
Sindri hafði verið í gæsluvarðhaldi í um tíu vikur eða frá því 2. febrúar. Fyrst á grundvelli rannsóknarhagsmuna en síðar á grundvelli almannahagsmuna. Í byrjun apríl var hann fluttur í Fangelsið Sogni en samkvæmt heimildum Vísis hafði hann borið fyrir sig geðrænum vandamálum. Heimildir DV herma að hann hafi tjáð fangavörðum að hann heyrði raddir.Í hvert sinn sem grunaður aðili er úrskurðaður í gæsluvarðhald er það af kröfu lögregluyfirvalda sem gera kröfuna fyrir dómi. Þar þarf lögregluembættið að rökstyðja hvers vegna þurfi að grípa til þeirra úrræða að hafa grunaðan mann í varðhaldi.
Í tilfelli Sindra Þórs var aðalkrafan um gæsluvarðhald á þeirri forsendu að hann væri líklegur til að halda uppteknum hætti. Hann væri grunaður um aðild að umfangsmiklum þjófnaði í þrjú gagnaver á sex vikum. Til vara gerði lögreglustjórinn þá kröfu að í ljósi þess að meintir samverkamenn Sindra héldu til í öðru landi, Sindri hefði selt búslóð sína og ætlaði að flytja úr landi væri hætta á að hann yfirgæfi landið.
Studdu ekki mótmæli með vísun í strokhættu
Páll segir þessar upplýsingar aldrei hafa borist Fangelsismálastofnun. Fjöldi krafna um varðhald fari í gegnum kerfið og þar komi aðeins fram hvort varðhaldið sé á grundvelli rannsóknarhagsmuna, þ.e. að hinn grunaði gæti spillt rannsókn gangi hann laus, eða almannahagsmuna. Að almannahagur sé sá að viðkomandi sé vistaður.„Ef engar sérstakar upplýsingar berast um viðkomandi þá erum við ekkert að rannsaka það sérstaklega,“ segir Páll.
Ólafur Helgi Kjartansson, lögreglustjóri á Suðurnesjum, tjáði Vísi í morgun að embættið hefði hreyft við mótmælum þegar Fangelsismálastofnun hugðist flytja Sindra Þór í opna fangelsið. Páll neitar því ekki en segir að ekki hafi verið á það bent að sem fram kom í varakröfu lögreglustjórans um gæsluvarðhald, þ.e. hættuna á að hann myndi flýja land.
„Við könnumst ekki við það,“ segir Páll Winkel.
Segist ætla að koma heim „fljótlega“
Lögreglu grunar að Sindri Þór haldi til á Spáni en veit það ekki fyrir víst. Sjálfur segist Sindri Þór hafa aðgang að peningum, fólki og fölsuðum skilríkjum. Í yfirlýsingu til Fréttablaðsins í morgun kom fram að hann ætlaði sér þó að koma heim „fljótlega“. Það væri þó háð þeim skilyrðum að íslensk lögregluyfirvöld myndu falla frá handtökuskipun á hendur honum erlendis.Ólafur Helgi Kjartansson lögreglustjóri á Suðurnesjum segir það ekki koma til greina. Lögregla stýri gangi mála og finnist Sindri ytra verði hann handtekinn.
Eigendur tölvubúnaðarins sem stolið var í þremur innbrotum í desember og janúar bjóða enn fundarlaun hverjum þeim sem getur bent á hvar búnaðinn er að finna. Virði hans er talið nema rúmum 200 milljónum króna en lögregla hefur engar upplýsingar um hvar hann sé að finna. Tölvubúnaðurinn var ætlaður til að grafa eftir rafmyntinni Bitcoin.
Tveir hafa stöðu sakbornings í málinu hvað varðar flótta Sindra Þórs. Þá hefur leigubílstjóri sem ók Sindra út á Keflavíkurflugvöll á þriðjudagsmorgun gefið sig fram við lögreglu. Tekin hefur verið skýrsla af honum en hann er ekki grunaður um neitt saknæmt.
