Árni Björn slær nýtt met

Afreksknapinn Árni Björn Pálsson gerði sér lítið fyrir og varð sigurvegari Meistaradeildar Cintamani í hestaíþróttum í fjórða sinn eftir hörkuspennandi úrslitakvöld í TM reiðhöllinni í Víðidal í Reykjavík. Hann innsiglaði sigurinn með góðu gengi í töltkeppni og úrvals spretti í flugskeiði. Með þessu slær Árni Björn nýtt met en enginn hefur áður unnið einstaklingskeppnina í Meistaradeildinni jafn oft.

Keppt var í tveimur greinum í gærkvöldi á lokamóti Meistaradeildar Cintamani í hestaíþróttum, tölti og flugskeiði í gegnum höllina. Árni Björn mætti með Ljúf frá Torfunesi í töltið, sýningin í forkeppni ekki hnökralaus, en góð einkunn, 7,80, og fjórða sætið. Árni Björn er þekktur fyrir keppnisskap og áræðni, setti meiri kraft í sýningu sína í A-úrslitum og uppskar annað sætið með 8,25 í aðaleinkunn.

Sýnt var beint frá keppninni á Stöð 2 Sport og má sjá brot úr sýningu Árna Björns í úrslitunum í meðfylgjandi myndskeiði.

Fyrirséð var að Árni Björn og Jakob Svavar Sigurðsson myndu berjast um efsta sætið í einstaklingskeppninni, enda skildu aðeins eitt og hálft stig þá að fyrir lokagreinarnar tvær. Munurinn jókst lítillega eftir töltið, þrjú og hálft stig var á milli þeirra og leiddi Jakob Svavar, en hann sigraði töltkeppnina glæsilega á Júlíu frá Hamarsey.

Þá var einungis flugskeiðið eftir, einföld tímataka og fljótasti sprettur myndi ráða úrslitum. Og það kom á daginn. Spennan magnaðist enn meir eftir fyrsta sprett en hann mistókst bæði hjá Jakobi Svavari og Árna Birni. Síðari spretturinn tókst hins vegar frábærlega hjá Árna Birni, flaug hann í gegnum höllina á Skykkju frá Breiðholti í Flóa á 4,88 sekúndum og uppskar þriðja sætið í keppnisgreininni og vann sér inn átta dýrmæt stig með því. Jakobi Svavari fataðist hins vegar flugið aftur, hestur hans lá ekki á skeiði og fór hann stigalaus út úr keppnisgreininni. Þessi niðurstaða varð til þess að Árni Björn skaust í heildarstigum upp fyrir Jakob Svavar, endaði með 52,5 stig og sigraði þar með Meistaradeildina í ár. Jakob Svavar varð annar með 48 stig og Viðar Ingólfsson þriðji með 35 stig.

Sjá má úrslitasprett Árna Björns í meðfylgjandi myndskeiði.

Niðurstöður í A-úrslitum í tölti:

1 Jakob Svavar Sigurðsson Júlía frá Hamarsey 8.78

2 Árni Björn Pálsson Ljúfur frá Torfunesi 8.25

3 Viðar Ingólfsson Pixi frá Mið-Fossum 8.17

4 Hulda Gústafsdóttir Draupnir frá Brautarholti 7.61

5 Guðmundur F. Björgvinsson Austri frá Úlfsstöðum 7.50

6 Teitur Árnason Sólroði frá Reykjavík 7.06

Bestu tímar í flugskeiði:

1 Konráð Valur Sveinsson Kjarkur frá Árbæjarhjáleigu II 4.73sek

2 Guðmundur F. Björgvinsson Glúmur frá Þóroddsstöðum 4.75sek

3 Árni Björn Pálsson Skykkja frá Breiðholti í Flóa 4.88sek

4 Bjarni Bjarnason Randver frá Þóroddsstöðum 4.96sek

5 Þórarinn Ragnarsson Hákon frá Sámsstöðum 4.97sek

6 Davíð Jónsson Irpa frá Borgarnesi 5.09sek