Borgarbúar vilja ávaxtatré, kalda potta og þrektæki

Ávaxtatré, kaldir pottar og ungbarnarólur eru á meðal sjötíu og sex verkefna sem borgarbúar kusu til framkvæmda á þessu ári. Borgarráð samþykkti í vikunni að bjóða út fjölbreyttar framkvæmdir fyrir fjögur hundruð og fimmtíu milljónir króna.

Rúmlega ellefu þúsund borgarbúar kusu á milli framkvæmda hugmynda sem bárust vefnum Betri Reykjavík. Sjötíu og sex verkefni hlutu brautargengi.

Borgarstjóri segir íbúana þekkja best hverfin sín og úrbótaþarfirnar.

„Með árunum þá fjölgar yndisreitum sem einhver á hugmyndina að og sér síðan verða að veruleika. Það er gaman að sjá hugmyndaauðgina sem í þessu felst og á hverju ári er alltaf eitthvað sem slær í gegn sem hefur ekki sést áður.“ Þetta segir Dagur B. Eggertsson, borgarstjóri.

Óskir borgarbúa fela meðan annars í sér að á þessu ári verða settir upp tveir kaldir pottar og ein vaðlaug. Ávaxtatré fyrir vegfarendur verður gróðursett í Háaleitishverfinu. Í nær öllum hverfum verða gerðar úrbætur á leikvöllum með uppsetningu á nokkrum ungbarnarólum. Þá verður líkamsræktaraðstöðu með þrektækjum komið upp utandyra í þremur hverfum.

„Já, það var alveg áberandi að þar sem vantar kalda potta í laugarnar þar slá þeir alveg í gegn. Nú fáum við kalda potta í Árbæjarlaug og Breiðholtslaug. Síðan koma fleiri leiksvæði í Grafarvogslaug, þarna eru ávaxtatré og viðbætur inn á Klambratún og í Hljómskálagarð þannig að það úir og grúir af skemmtilegum tillögum í ár,“ segir Dagur.

Á vef Reykjavíkurborgar er hægt að lesa sér til um allar þær tillögur sem hlutu brautargengi.