NBA: Boston tapaði aftur og Cleveland slapp með skrekkinn | Myndbönd

Joel Embiid hélt upp á það að hafa verið kosinn í byrjunarlið Stjörnuleiksins með stórleik á móti Boston Celtics í NBA-deildinni í körfubolta í nótt og Isaiah Thomas tryggði Cleveland Cavaliers eins stigs sigur á vítalínunni.

Joel Embiid skoraði 26 stig og tók 16 fráköst þegar Philadelphia 76ers vann 89-80 útisigur á Boston Celtics. Boston menn réðu ekkert við Embiid sem var einnig með 6 stoðsendingar og 2 varin skot. Dario Saric bætti við 16 stigum fyrir Philadelphia liðið sem vann sinn sjötta sigur í síðustu sjö leikjum. T.J. McConnell skoraði líka 15 stig og komu þau öll í seinni hálfleik.

Kyrie Irving var ekki með Boston liðinu í leiknum en þeir Al Horford og Marcus Morrisvoru stigahæstir með 14 stig hvor. Þetta var annar tapleikur Boston í röð en þar á undan var liðið á sjö leikja sigurgöngu.

Isaiah Thomas setti niður tvö víti þegar ellefu sekúndur voru eftir og tryggði Cleveland Cavaliers 104-103 sigur á Orlando Magic.

Orlando átti lokasóknina og Aaron Gordon hélt að hann hefði tryggt Magic liðinu sigur en dómararar dæmdu leikbrot og körfuna þar með af. Cleveland slapp því með skrekkinn en liðið hafði misst niður 23 stiga forystu.

Isaiah Thomas var stigahæstur hjá Cavaliers með 21 stig en LeBron James skoraði 16 stig. Cleveland hafði tapað fjórum leikjum í röð og átta af tíu en náði loksins í sigur. Elfrid Payton var stigahæstur hjá Orlando með 19 stig en Orlando liðið hefur nú tapað 17 af síðustu 19 leikjum sínum.

James Harden snéri aftur til baka eftir meiðsli þegar Houston Rockets vann 116-98 sigur á Minnesota Timberwolves. Harden hafði ekki spilað leik á nýju ári eftir að hafa tognað aftan í læri á síðasta degi ársins 2017. Harden endaði með 10 stig og 7 stoðsendingar en hann hitti aðeins úr 3 af 15 skotum sínum.

Chris Paul var með 19 stig, 9 stoðsendingar og 6 fráköst og Clint Capela bætti við 20 stigum. Jimmy Butler var stigahæstur hjá með 23 stig en Karl-Anthony Towns var með 22 stig, 16 fráköst og 5 varin skot.

Úrslit úr leikjum NBA-deildarinnar í nótt:

Portland Trail Blazers - Indiana Pacers    100-86    

Houston Rockets - Minnesota Timberwolves    116-98    

Boston Celtics - Philadelphia 76ers    80-89    

Cleveland Cavaliers - Orlando Magic    104-103