Mikill fjöldi nema notar lyf fyrir próf

Um fimmtungur íslenskra háskólanema hefur notað lyfseðilsskyld lyf sem stíluð eru á annan. Stærstur hluti þeirra segist hafa notað slík lyf til að bæta náms­árangur eða í aðdraganda prófa.

Þetta er meðal þess sem lesa má úr niðurstöðum könnunar sem Lyfjastofnun gerði. Langflestir, eða um fjörutíu prósent, útveguðu sér lyfin frá foreldrum sínum. Um einn af hverjum sjö fékk þau hjá skólafélaga og álíka stór hópur útvegaði slík lyf í gegnum söluaðila sem var þeim ókunnugur.

Ríflega þrír af hverjum fjórum höfðu heyrt að lyfseðilsskyld lyf væru notuð til að bæta námsárangur. Um tuttugu prósent höfðu notað slík lyf til að njóta hugbreytandi áhrifa þeirra við skemmtanahald.