Fjórfaldaði fjárfestinguna í Ölgerðinni á sex árum

Héraðsdómur Reykjavíkur telur ljóst að félagið ET Sjón, sem er í eigu augnlæknisins Eiríks Ingvars Þorgeirssonar, hafi ekki orðið fyrir tjóni vegna fjárfestingar sinnar í Ölgerðinni. Ástæðan sé sú að félagið hafi ríflega fjórfaldað fjárfestingu sína á sex árum og hlotið 27 prósenta árlega arðsemi.

Í dómi héraðsdóms í máli félagsins gegn Kviku banka, sem kveðinn var upp í síðasta mánuði, er bent á að félagið hafi haustið 2010 keypt 28,2 prósenta hlut í eignarhaldsfélaginu Þorgerði, sem stofnað var utan um kaup á 45 prósenta hlut í Ölgerðinni, fyrir 240 milljónir króna. Sex árum síðar, eða í október 2016, hafi Þorgerður selt hópi fjárfesta hlut sinn í drykkjarvöruframleiðandanum á 5,2 milljarða króna. Að teknu tilliti til kostnaðar, arðgreiðslna á fjárfestingartímanum og fleiri þátta megi ætla að um einn milljarður króna hafi þá fallið í skaut ET Sjónar.

Héraðsdómur sýknaði Kviku af 300 milljóna króna skaðabótakröfu ET Sjónar. Taldi félagið sig hafa orðið fyrir tjóni vegna meintrar ófullnægjandi ráðgjafar af hálfu Auðar Capital, sem síðar sameinaðist Virðingu. Kvika festi síðan kaup á öllu hlutafé Virðingar á síðasta ári.

Félag Eiríks taldi sig hafa orðið fyrir tjóni af tveimur ástæðum. Annars vegar vegna endurálagningar ríkisskattstjóra á Ölgerðina vegna öfugs samruna félagsins frá árinu 2007 og hins vegar vegna ágreinings Ölgerðarinnar við Lýsingu um lögmæti fjármögnunarleigusamninga en Hæstiréttur komst að þeirri niðurstöðu 2014 að gengistryggingarákvæði samninganna væri ekki ólögmætt.

Dómurinn féllst ekki á að félagið hefði orðið fyrir tjóni af þessum sökum. Félagið hafi hagnast verulega á fjárfestingunni. Á því var auk þess byggt í málatilbúnaði Kviku. Sagði bankinn að 27 prósenta árleg ávöxtun væri „stórkostlegur árangur og fyllilega í samræmi við þau markmið sem lagt var upp með“.

Fréttin birtist fyrst í Markaðinum, fylgiriti Fréttablaðsins um viðskipti og fjármál.