Pro Bowl sýnt á Stöð 2 Sport

Pro Bowl, stjörnuleikur NFL-deildarinnar fer fram í Orlando á Flórída í kvöld og verður hann sýndur í beinni útsendingu á Stöð 2 Sport 3. Útsendingin hefst klukkan 20.00.

Bestu leikmenn deildarinnar, sem eru ekki að fara að spila í Super Bowl um næstu helgi, verða þar samankomnir og sýna þeir listir sínar er úrvalslið Þjóðardeildarinnar (NFC) og Ameríkudeildarinnar (AFC) mætast.

Pittsburgh Steelers á flesta fulltrúa í Pro Bowl þetta tímabilið eða átta talsins.

Hitað hefur verið upp með alls kyns viðburðum í vikunni og má sjá mörg skemmtileg myndbönd af því á heimasíðu NFL.

Eins og gefur að skilja er ekki hart tekist á því í stjörnuleiknum og skemmtun í fyrirrúmi. Það má því eiga von á að mörg snertimörk verði skoruð í kvöld.

Super Bowl, úrslitaleikur NFL-deildarinnar fer svo fram á sunnudag eftir viku en þar eigast við lið New England Patriots og Philadelphia Eagles. Sýnt verður vitaskuld beint frá þeim leik á Stöð 2 Sport.