Lunga Ashley Williams féll saman eftir samstuð við Chicharito

Liðsfélagi Gylfa Þórs Sigurðssonar hjá Everton, Ashley Williams, lenti í miklum hremmingum í vináttulandsleik Wales og Mexíkó í vikunni þar sem lunga hans féll saman.

Williams er fyrirliði velska landsliðsins og var hann að spila sinn fyrsta leik í nær þrjá mánuði en þurfti að fara af velli eftir aðeins 20 mínútur eftir samstuð við Javier Hernandez.

Á Facebook síðu sinni greindi Williams frá því að hann hafi brotið tvö rifbein og rifið í sér lungað sem varð til þess að það féll saman.

Leikurinn endaði með markalausu jafntefli. Mexíkó er á leið á HM í Rússlandi en Wales komst ekki í lokakeppni HM svo Williams fær nægan tíma til þess að ná sér af meiðslunum fyrir komandi tímabil með Everton.