Hannes Smárason hættir hjá líftæknifélagi

Líftæknifélagið WuXi NextCode hefur tilkynnt að Hannes Smárason hafi látið af störfum sem forstjóri félagsins. Hannes er sagður ætla að sinna öðrum frumkvöðlastörfum en halda áfram ráðgjafarstörfum fyrir félagið.

Hannes var ráðinn forstjóri félagsins í febrúar í fyrra. Fyrirtækið varð til við sameiningu NextCode, dótturfélags Íslenskrar erfðagreiningar, og WuXi Genome Center.

Félagið hefur verið með starfsemi hér á landi, í Sjanghæ í Kína og Massachusetts í Bandaríkjunum. Vefsíðan Bio-IT World greinir frá brotthvarfi Hannesar. Eftirmaður hans er Rob Brainin sem hefur verið varaforseti framkvæmdastjórnar og framkvæmdastjóri. 

Hannes átti þátt í stofnun Nextcode árið 2013 og hafði umsjón með sameiningu þess við WuXi Genome Center. Samruninn átti sér stað í kjölfar yfirtöku félagsins WuXi AppTec á NextCode árið 2015 fyrir átta og hálfan milljarð króna.