Ungir Íslendingar keppa í iðngreinum

Átta ungir Íslendingar munu keppa í fjölbreyttum greinum í Euroskills keppninni í iðngreinum sem haldin er í Búdapest í Ungverjalandi og hefst á morgun. Íslensku þátttakendurnir keppa í rafvirkjun, rafeindavirkjun, málmsuðu, trésmíði, grafískri hönnun, bakstri, framleiðslu og matreiðslu en það er Verkiðn sem sendir þá til leiks.

28 Evrópulönd senda keppendur til leiks í 35 greinum. Opnunarhátíð Euroskills fór fram í dag.

„Euroskills er mjög góður vettvangur fyrir allar okkar iðngreinar til að mæla sig við það sem best gerist í Evrópu og til að sækja nýja þekkingu og stuðla að stöðugri framþróun í þessum iðngreinum,“ segir segir Adam Kári Helgason, frá Rafiðnarðarsambandi Íslands í tilkynningu en hann er einn af þjálfurum rafvirkjans í keppninni.

„Það er gaman að sjá keppendur okkar í svona fjölbreyttum og krefjandi greinum að spreyta sig. Það er frábær stemmning í íslenska hópnum og það verður spennandi að sjá hvernig okkar keppendum gengur. Það stefna allir auðvitað á að gera land og þjóð stolta og skara framúr í keppninni,“ segir Adam ennfremur.

Íslensku keppendurnir eru Ásbjörn Eðvaldsson, sem keppir í rafeindavirkjun, Þröstur Kárason, sem keppir í trésmíði, Finnur Ingi Harrýsson, sem keppir í málmsuðu, Haraldur Örn Arnarson, grafískur hönnuður, Þórey Lovísa Sigurmundsdóttir bakari, Sigurður Borgar Ólafsson, þjónn sem keppir í framleiðslu og Kristinn Gísli Jónsson kokkur. Þau eru sveinar og nemar í sínum fögum.

Auk þeirra eru átta íslenskir dómarar með í för sem dæma í keppninni. Einnig er haldin ráðstefna um menntamál í iðngreinum til framtíðar í tengslum við Euroskills þar sem farið er yfir hvernig iðngreinar þróast, fjallað um fjórðu iðnbyltinguna og fleira.

Hægt verður að fylgjast með gangi keppendanna á Instagramsíðu Iðngreinar Íslands.