Á Vettel möguleika á titlinum?

Sebastian Vettel hjá Ferrari er 40 stigum á eftir Lewis Hamilton hjá Mercedes í keppni ökuþóra í Formúlu 1. Einungis 150 stig eru eftir í pottinum nú þegar sex keppnir eru eftir af tímabilinu.

Margir vilja meina að Þjóðverjinn eigi enga möguleika á titli með bilið svona mikið. Þó þarf Vettel ekki annað en að vinna allar þær keppnir sem eftir eru til að standa uppi sem heimsmeistari, jafnvel þó að Hamilton yrði alltaf annar á eftir honum.

Ferrari bíllinn hefur verið hraðari en Mercedes í síðustu keppnum. En Vettel og Ferrari hafa verið að kasta frá sér sigrum og þar með fjölmörgum stigum.

Til dæmis gerði Vettel mistök í heimakeppni sinni er hann fór útaf úr fyrsta sætinu. Þar glötuðust 25 stig auk þess að Hamilton græddi önnur sjö við að komast frítt upp í fyrsta sætið.

Vettel vildi kenna liði sínu um taktísk mistök í tímatökum í Singapúr, braut sem að Mercedes liðið hefur ávalt átt erfitt uppdráttar á. Fyrir vikið byrjaði Vettel þriðji á ráspól og tapaði öðrum tíu stigum á keppinaut sinn í kappakstrinum.

Næsti kappakstur fer fram á einni skemmtilegustu braut tímabilsins, Suzuka í Japan. Þar verður Vettel að vinna Hamilton ef Þjóðverjinn ætlar sér sinn fimmta titil.