Tveir Ís­lendingar í haldi í Ástralíu grunaðir um stór­felldan fíkni­efna­inn­flutning

Tveir Íslendingar eru í haldi í Ástralíu eftir að mikið magn af kókaíni, alls 6,7 kíló, fundust í ferðatösku annars þeirra á alþjóðaflugvellinum í Melbourne sem og á hótelherbergi þar sem hinn hafði dvalið.

Frá þessu er greint á vef ástralska miðilsins Herald Sun og vitnað í áströlsku alríkislögregluna en á vef áströlsku tollgæslunnar segir að mennirnir hafi verið handteknir á mánudag.

Annar þeirra er 25 ára gamall og var handtekinn á flugvellinum eftir að tollverðir fundu fjögur kíló af kókaíni falin í ferðatösku hans. Var maðurinn á leið frá Hong Kong inn til Ástralíu. Hann hefur verið úrskurðaður í gæsluvarðhald til 13. febrúar á næsta ári.

Hinn maðurinn, sem er þrítugur, var handtekinn á hóteli í Melbourne eftir að 2,7 kíló af kókaíni fundust á hótelherbergi hans. Að því er segir á vef tollgæslunnar mun hann koma fyrir dómara í dag.

Talið er að virði efnanna sé alls um 2,5 milljónir ástralskra dollara eða sem samsvarar um 218 milljónum króna. Brot mannanna varða við lífstíðarfangelsi.

We recently arrested 2 Icelandic men over an alleged attempt to smuggle cocaine via @Melair. The first man was stopped after 4kg of the drug was located during a baggage search. A second man was later detained at a hotel with around 2.7kg of cocaine. More: https://t.co/3kYwb7VtL3pic.twitter.com/3x1B4jSXBA

— ABF (@AusBorderForce) November 7, 2018