Lewis Hamilton fyrstur í mark í Kína

Lewis Hamilton á Mercedes kom fyrstur í mark. Sebastian Vettel á Ferrari varð annar og Max Verstappen á Red Bull varð þriðji.

Vettel og Hamilton eru þar með jafnir að stigum í keppni ökumanna. Baráttan verður hörð í ár.

Keppnin hófst á rakri braut en engin rigning að falla þegar keppnin var ræst. Stoffel Vandoorne, ökumaður McLaren sagði að ökumenn þyrftu að ákveða hvort sléttu þurrdekkin væru nógu góð til að hefja keppnina eða hvort milli-regndekkin væru réttu dekkin.

Carlos Sainz á Toro Rosso var eini ökumaðurinn sem ræsti á þurrdekkjum. Hann ræsti á ofur-mjúkum dekkjum.

Kimi Raikkonen tapaði fjórða sætinu til Daniel Ricciardo í ræsingunni. Max Verstappen á Red Bull ræsti 16. en var orðinn sjöundi á fyrsta hring.

Stafrænn öryggisbíll var notaður á brautinni á meðan Williams bíll nýliðans, Lance Stroll var hirtur úr malargryfjunni eftir samstuð við Sergio Perez.

Ökumenn hópuðust inn á þjónustusvæðið í lok fyrsta hrings til að taka þurrdekk, þar á meðal Sebastian Vettel. Antonio Giovinazzi skellti Sauber bílnum á varnarvegg á ráskaflanum, ekki ósvipað atvikinu í tímatökunni í gær. Þá var öryggisbíllinn kallaður út og ökumenn leiddir í gegnum þjónustusvæðið og þá nýttu flestir sér tækifærið til að skipta yfir á þurrdekk.

Valtteri Bottas var fimmti þegar öryggisbíllinn var að koma inn en svo missti hann stjórn á bílnum og tapaði sjö sætum og var orðinn 12.

Verstappen tók fram úr Raikkonen á fyrsta hring eftir að öryggisbíllinn kom inn og Verstappen var þá orðinn þriðji. Hann stal svo öðru sætinu af liðsfélaga sínum, Ricciardo og var orðinn annar á eftir Hamilton á 11. hring.

Vettel tók fram úr Raikkonen á 20. hring og gat þá hafist handa við að reyna sókn á Ricciardo. Vettel tróð sér svo fram úr Ricciardo og náði þriðja sætinu tveimur hringjum seinna. Vettel náði öðru sætinu við lok 28. hringjar. Hann var þá um 11 sekúndum á eftir Hamilton.

Vettel kom inn á þjónustusvæðið á hring 34 og tók mjúk dekk undir, Hamilton svaraði í sömu mynt á 36 hring. Vettel sótti aðeins á Hamilton og kom bilinu niður í um sjö sekúndur þegar minnst var en það dugði ekki til.

Baráttan um þriðja sætið á milli Verstappen og Ricciardo hitnaði á síðustu hringjum keppninnar. Ricciardo var kominn vel inn fyrir sekúnduna á hring 50 og var farinn að opna afturvænginn. Ricciardo tókst þrátt fyrir góðar tilraunir ekki að stela verðlaunasætinu af liðsfélaga sínum.

Hér að neðan má sjá gagnvirkt brautarkort sem sýnir öll helstu úrslit helgarinnar.