Hluthafar ræddu samstarf Kjarnans og Fréttatímans

Sigurður Gísli Pálmason, hluthafi í útgáfufélagi Fréttatímans, og Vilhjálmur Þorsteinsson, einn eigenda Kjarnans, funduðu samkvæmt heimildum Markaðarins um síðustu helgi og ræddu mögulegt samstarf fjölmiðlanna tveggja. Fjárfestarnir vildu ekki tjá sig um gang viðræðnanna þegar blaðamaður náði tali af þeim eða hvort stefnt sé að sameiningu miðlanna.

„Ég get nú ekkert gefið neitt komment á það. Auðvitað eru menn alltaf að velta fyrir sér fjölmiðlabransanum og stöðu hans og horfum. Það þarf ekkert endilega að vera meira en það en ég ætla svo sem ekki að gefa neinn ádrátt um eitthvað meira en það,“ sagði Vilhjálmur.

Dexter fjárfestingar ehf., í eigu Sigurðar Gísla, á 29 prósenta hlut í Morgundegi, útgáfufélagi Fréttatímans. Vilhjálmur er annar stærsti hluthafi Kjarnans Miðla ehf. með 15,98 prósent í gegnum félag sitt Miðeind ehf. 

Eigendur Fréttatímans hafa síðan í janúar stefnt að stofnun Frjálsrar fjölmiðlunar, félags sem leitar til almennings um stuðning við frjálsa og óháða blaðamennsku. Hlutafé Kjarnans var aukið lítillega í apríl í fyrra þegar hjónin Guðmundur Hafsteinsson og Edda Hafsteinsdóttir bættust í eigendahópinn. Hluthafar Kjarnans eru ellefu talsins og er Hjálmar Gíslason, stofnandi Datamarket og stjórnarformaður Kjarnans, stærsti eigandi fjölmiðilsins með 16,55 prósent í gegnum félag sitt HG80 ehf. Auk Sigurðar Gísla á Gunnar Smári Egilsson, ritstjóri Fréttatímans, 46 prósenta hlut og Valdimar Birgisson, framkvæmdastjóri blaðsins, 25 prósent.

Fréttin birtist í Markaðnum, fylgiriti Fréttablaðsins um viðskipti og efnahagsmál.