Westbrook með 29. þrennuna en Boogie fékk 18. tæknivilluna | Myndbönd

Oklahoma City Thunder vann í nótt átta stiga sigur á New Orleans Pelicans í NBA-deildinni í körfubolta, 118-110, á heimavelli sínum. Russell Westbrook fór hamförum enn eina ferðina og nældi sér í 29. þrennuna á tímabilinu með 41 stigi, ellefu fráköstum og ellefu stoðsendingum.

New Orleans er nú búið að tapa öllum þremur leikjum sínum eftir að liðið fékk til sín einn hæfileikaríkasta stóra mann deildarinnar, DeMarcus „Boogie“ Cousins, en hann spilaði samt ótrúlega vel í nótt og skoraði 31 stig og tók tíu fráköst og aðeins 21 mínútu.

Á meðan Westbrook er búinn að gera það að listgrein að næla sér í þrennur er Cousins með svarta beltið í tæknivillum enda frekar tæpur leikmaður. Hann fékk eina slíka í nótt sem var hans 18. á tímabilinu og á hann því yfir höfði sér enn eitt leikbannið.

Cousins kláraði ekki leikinn því hann fékk sína sjöttu villu þegar tæpar þrjár mínútur voru eftir. Hann braut þá á Russell Westbrook er leikstjórnandinn ótrúlegi gerði sér lítið fyrir og tróð yfir stóra manninn með látum. Algjörlega geggjuð tilþrif hjá Westbrook.

Cousins fékk tæknivillu og tvær hefðbundnar villur á fyrstu 95 sekúndunum sem hann spilaði en þar sem hann er búinn að fá svo margar tæknivillur á tímabilinu fer hann sjálfkrafa í bann ef hún verður ekki tekin til baka.

Anthony Davis skoraði 38 stig, tók sjö fráköst og gaf fjórar stoðsendingar fyrir Pelicans en stóru mennirnir skoruðu því í heildina 69 stig af 110 stigum New Orleans. „Við erum að læra að spila saman,“ sagði Cousins við fréttamenn eftir leik.

Úrslit næturinnar:

LA Lakers - San Antonio Spurs 98-119

Milwaukee Bucks - Phoenix Suns 100-96

Denver Nuggets - Memphis Grizzlies 98-105

Washington Wizards - Utah Jazz 92-102

Toronto Raptors - Portland Trail Blazers 112-106

Detroit Pistons - Boston Celtics 98-104

OKC Thunder - New Orleans Pelicans 118-110

LA Clippers - Charlotte Hornets 124-121