Valitor kaupir Chip & PIN Solutions

Valitor hefur gengið frá kaupum á breska fyrirtækinu Chip & PIN Solutions sem starfar á sviði kortatengdra greiðslumiðlunarlausna.

Í tilkynningu frá Valitor kemur fram að einungis tveir mánuðir séu liðnir síðan Valitor festi kaup á öðru bresku greiðslumiðlunarfyrirtæki, IPS LTD.

„Kaupin á Chip & PIN Solutions breikka til muna þann viðskiptavinahóp Valitor í Bretlandi sem fyrirtækið þjónar milliliðalaust. Hinir 7.000 nýju viðskiptavinir, sem nú bætast við í gegnum Chip & PIN Solutions, munu njóta ávinnings af sérhæfðum vörum fyrir kaupmenn, s.s. Mii-Promo vildarkerfisins sem Markadis, dótturfélag Valitor, býður upp á.

Í kjölfar kaupanna munu allir viðskiptavinir Valitor og Chip & PIN Solutions eiga kost á samhæfðri og straumlínulagaðri greiðslumiðlunarþjónustu eins og sama aðilans á sviði netverslunar, snjallsímaverslunar og verslunar á sölustað,“ segir í tilkynningunni.

Haft er eftir Viðari Þorkelssyni, forstjóra Valitor, að kaupin á Chip & PIN Solutions séu strategískt mjög þýðingarmikil fyrir Valitor. „Þau sýna svart á hvítu að við erum staðráðin í að sækja fram af krafti á þessum lykilmarkaði. Chip & PIN Solutions hafa getið sér gott orð fyrir vandaða þjónustu við fjölmennan hóp viðskiptavina en innan þeirra raða eru skrásett FTSE 500 félög. Með öflugt teymi starfsmanna er okkur ekkert að vanbúnaði að styrkja markaðshlutdeild okkar og samkeppnishæfni enn frekar á breska markaðnum. Þar skiptir líka verulegu máli að í árslok 2016 veitti fjármálaeftirlitið í Bretlandi Valitor svokallað „E-Money licence“ þar í landi,” segir Viðar.